کپل شرما اور سنیل گروور کے تعلقات میں بہتری آنے لگی

کپل شرما شو کی جوڑی اور معروف کامیڈین کپل شرما اور سنیل گروور کے مابین کشیدہ تعلقات اب بہتر ہونا شرو ع ہوگئے ہیں اور دونوں فنکار ایک دوسرے کی تعریف کرتے نظر آرہے ہیں ۔

کپل شرما نے والدہ کی سالگرہ پر سوشل میڈیا پر ان کی تصویر شیئر کی تو سنیل گروور نے بھی کپل کو مبارک باد دی ، جس کے جواب نے کپل نے سنیل کا شکریہ اداکیا ۔

سنیل گروور اور کپل شرما ایک ساتھ ’دی کپل شرما شو‘ میں جلوہ گر ہوتے تھے لیکن 2017 میں آسٹریلیا سے واپسی پر دوران پرواز ہونے والی لڑائی دونوں کی علیحدگی کا سبب بنی تھی۔

دونوں فنکاروں کی لڑائی کے بعد ’دی کپل شرما شو‘ کی پوری ٹیم بکھر گئی اور سنیل گروور، علی اصغر سمیت متعدد اداکاروں نے شو کو خیرباد کہہ دیا تھا۔

سنیل اور دیگر اداکاروں کے شو چھوڑ جانے کے بعد کپل کا شو بھی ٹی آر پی ریٹنگ میں تنزلی کا شکار ہوگیا تھا جس کے باعث ٹی وی انتظامیہ کو شو ہی بند کرنا پڑا۔

شو بند ہونے کے بعد سنیل گروور نے ذاتی حیثیت میں سلمان خان سمیت کئی بالی وڈ اداکاروں کی فلموں کی تشہیر کی اور کپل کے ساتھ کام کرنے سے انکار کردیا۔

حال ہی میں سنیل گروور ایک نئے شو ’کان پور والے کھرانہ‘ کے ساتھ ٹی وی پر جلوہ گر ہوئے ہیں لیکن کپل شرما کے ’دی کپل شرما شو ‘ سیزن ٹو کے شروع ہونے کے بعد اس شو کی بھی ٹی آر پی گرگئی ہے۔

سنیل گروور نے سلمان خان کے ساتھ فلم ’بھارت‘ بھی سائن کر رکھی ہے جس کی شوٹنگ کے باعث ان کا شو بھی آف ایئر کردیا گیا ہے لیکن دوسری طرف کپل شرما اور سنیل گروور کے تعلقات پر جمی برف پگھلنا شروع ہوگئی ہے جس کا اظہار سوشل میڈیا پر دونوں اداکاروں کی جانب سے تہنیتی پیغامات بنے ہیں۔

گزشتہ دنوں کپل شرما نے والدہ کی سالگرہ پر ان کی مسکراتی ہوئی تصویر پوسٹ کرکے مبارکباد دی تھی جس پر سنیل نے بھی ان کی والدہ کو مبارکباد کا پیغام دیا جس کے جواب میں کپل شرما نے سنیل کا شکریہ ادا کیا۔

یہی نہیں کپل شرما نے اپنی شادی میں بھی سنیل گروور کو دعوت دی تھی لیکن پیشہ وارانہ مصروفیات کے باعث وہ شرکت نہ کرسکے تھے تاہم انہوں نے سوشل میڈیا پر شادی شدہ جوڑے کیلئے نیک تمناؤں کا اظہار کیا تھا۔

دوسری طرف سنیل گروور کا نیا شو ’کان پور والے کھرانا‘ بند ہونے کے بعد ان کی کپل شرما کے شو میں واپسی کی چہ مگوئیاں کی جارہی ہیں۔

بھارتی میڈیا رپورٹس میں دعویٰ کیا گیا ہے کہ فلم ’بھارت‘ کی 35 روزہ شوٹنگ کے بعد سنیل ایک بار پھر کپل شرما شو میں ’ڈاکٹر مشہور گولاٹی اور رنکو بھابھی‘ کے روپ میں نظر آئیں گے۔