مقبوضہ کشمیر: شوپیاں میں مزید 2 نوجوان شہید

مقبوضہ کشمیر میں بھارتی قابض فوج کی جانب سے مظلوم و بے گناہ کشمیریوں پر ظلم وستم اور اذیتوں کے پہاڑ توڑنے کا سلسلہ جوں کا توں جاری ہے۔

مقبوضہ کشمیر کے علاقے شوپیاں میں بھارتی فوج نے تازہ پر تشدد کارروائی میں مزید 2 کشمیری نوجوانوں کو شہید کر دیا۔

کشمیر میڈیا سروس کی رپورٹ کے مطابق قابض فوج نے آج صبح ضلع شوپیاں کے علاقے کا محاصرہ کیا اور فائرنگ کرکے 2 کشمیری نوجوانوں کو شہید کر دیا۔

بھارتی فوج کے مظالم کے خلاف اہل علاقہ سڑکوں پر نکلے تو ان پر پیلٹ گنوں سے فائرنگ اور آنسو گیس کی شیلنگ کی گئی جس سے متعدد کشمیری زخمی ہو گئے۔

قابض فوج نے اب بھی علاقے کو گھیرے میں لے رکھا ہے جبکہ قابض انتظامیہ کی جانب سے ضلع شوپیاں میں انٹرنیٹ سروس بھی معطل کردی گئی ہے۔