انور مقصود کا نیا ڈراما’’ ناچ نہ جانے‘‘کی تیاریاں

29 جنوری ، 2019

آرٹس کونسل آف پاکستان کراچی پروڈکشن ہاؤس کے زیر اہتمام اسٹیج ڈراما ”ناچ نہ جانے“ یکم مارچ 2019 سے شروع ہو گا۔ اس سلسلے میں انور مقصود کی قیادت میں ڈرامے کی ریہرسل شروع ہوگئی ہے۔

انور مقصود کا نیا ڈراما’’ ناچ نہ جانے‘‘کی تیاریاں

یہ آرٹس کونسل آف پاکستان کراچی کے پروڈکشن ہاؤس کا پہلا ڈراما ہو گا جو کہ کاپی کیٹس پروڈکشن کے تعاون سے پیش کیا جائے گا۔ انور مقصود کا کہنا ہے کہ ڈراما ’’ناچ نہ جانے‘‘ آنگن ٹیڑھا کا پری ایکول ہے ، جس میں اکبر کا کردار یاسر حسین ادا کر چکے ہیں۔ ان کی سات سال بعد تھیٹر میں واپسی ہوئی ہے۔ اس دوران یہ فلموں میں بھی کردار ادا کر چکے ہیں۔ انورمقصود نے بتایا کہ ’’ناچ نہ جانے‘‘ سے حاصل آمدنی ان ادیبوں، شاعروں اور فن کاروں کو دی جائے گی ، جن کے پاس ذریعہ روزگار نہیں ہے۔ وہ ایک مدت تک اس انڈسٹری کو اپنا سب کچھ دیتے رہے ہیں اور اب ان کا حق بنتا ہے کہ ہم ان کی مدد اور تعاون کریں۔ محمد احمد شاہ نے کہا کہ اس ڈرامے کی آمدنی کی ایک ایک پائی فن کاروں ادیبوں اور شاعروں کو پہنچائی جائے گی۔ یاسر حسین کا کہنا تھا کہ وہ پہلے بھی انور مقصود کے ساتھ کام کر چکے ہیں، جب کہ یہ ان کی خوش قسمتی ہے کہ انہیں دوبارہ موقع مل رہا ہے۔ ڈرامے کے ڈائریکٹر داور محمود نے کہا کہ یکم مارچ سے لوگ ہمیں اسٹیج پر دیکھ سکیں گے۔ دو ماہ تک ڈراما کراچی آرٹس کونسل میں ہوگا۔ (الف۔ عین۔ الف)

تازہ ترین