’آغا سراج درانی کی گرفتاری ’تشویشناک‘ ہے‘‘

20 فروری ، 2019

پیپلز پارٹی کے ترجمان سینیٹرمولابخش چانڈیونے اسپیکر سندھ اسمبلی کی گرفتاری کی سخت مذمت کرتے ہوئے اسے تشویشناک قرار دے دیا۔

سینیٹر مولابخش چانڈیو کا کہنا ہے کہ آغا سراج ایک شخص نہیں بلکہ اسپیکر سندھ اسمبلی ہیں، انہیں ایسے کیسے گرفتار کیا جا سکتا ہے، نیب کی کارروائی سے لگتا ہے کہ اسپیکر سندھ اسمبلی کےاسلام آباد آنے کا انتظار کیا گیا۔

ُپی پی کے سینئر رہنما کا کہنا تھا کہ گرفتاری اگر قانونی ہے تو آغا سراج کو کراچی گرفتار کرنے کے بجائے اسلام آباد سے کیوں اٹھایا گیا ؟ آخر ہتھکڑیاں لگا کر کراچی لے جانا کیا پیغام دے گا؟

انہوںنے کہا کہ وفاقی دارالحکومت تمام صوبوں کا ہے، کسی ایک جماعت کا نہیں ہے انہیں اسلام آباد سے گرفتار کر کے ایک خطرناک تاثر دیا گیا ہے۔

مولابخش چانڈیو نے مزید کہا کہ وفاق کو صوبوں اور صوبوں کو وفاق کے نمائندوں کا احترام کرنا ہوگا، اگرایسا رویہ رہا تو وفاقی حکومت کے نمائندے صوبوں میں غیرمحفوظ ہو جائیں گے۔

مولابخش چانڈیونے حکومت کو تنقید کا نشانہ بناتے ہوئےکہا کہ اس حکومت نے ملک و قوم کو افراتفری کے سوائے کچھ نہیں دیا۔

مولابخش چانڈیونےکہا کہ تحقیقات وزیراعلیٰ خیبرپختونخواہ اور وفاقی وزیر دفاع کیخلاف بھی جاری ہیں، آخرتحریک انصاف کے ان رہنمائوں کو کیوں کوئی پوچھنے والا نہیں۔

تازہ ترین