لاہور (سٹاف رپورٹر،خصوصی نمائندہ)سیکرٹری جنرل جماعت اسلامی پاکستان لیاقت بلوچ نے کہاہے کہ پیپلز پارٹی اور مسلم لیگ ن طویل مدت تک اقتدار میں رہیں مگر انہوں نے جمہوریت کو پنپنے کا موقع نہیں دیا اور اپنی شخصی آمریت قائم رکھی ۔ سیاسی اور جمہوری جماعتوں کے نام پر پارٹیوں پر خاندانی تسلط قائم رکھنے کے لیے کسی دوسرے کو پارٹی قیادت تک نہیں پہنچنے دیا ۔ تبدیلی کے سہانے خواب دکھانے والوں کی چھ ماہ کی کارکردگی سے عوام مایوس ہوچکے ہیں ۔ ڈالروں کی بارش کے باوجود ملکی معیشت خشک سالی کا شکار ہے ۔ ان خیالات کااظہار انہوں نے منصورہ میں پانچ روزہ تربیت گاہ کے شرکاءسے خطاب کرتے ہوئے کیا ۔ تربیت گاہ سے نائب امیر جماعت اسلامی پاکستان راشد نسیم نے بھی خطاب کیا ۔لیاقت بلوچ نے کہاکہ پی ٹی آئی حکومت ڈلیور کرنے میں ناکام رہی ہے ۔ ۔ لیاقت بلوچ نے کہاکہ قرضوں اور خیرات سے معیشت ٹھیک نہیں ہوتی ۔ سودی معیشت ہی تباہی کا اصل سبب ہے۔ حکمران پوری طرح عوام کے سامنے بے نقاب ہوچکے ہیں ۔ اسٹیبلشمنٹ کے ہاتھ بھی کچھ نہیں آیا ۔ انہوں نے کہاکہ جماعت اسلامی یکم مارچ سے 31 مارچ تک ملک بھر میں رابطہ عوام مہم چلائے گی ۔