’نمبر پلیٹ ہیما چل کی ہے، پر میں ہوں کشمیری‘

23 فروری ، 2019

بھارت میں دو شہریوں نے ایک نوجوان کشمیری صحافی کا راستہ روک کر اس پر حملہ کر دیا۔

24 سالہ کشمیری صحافی جبران نذیر بھارتی شہر پونے میں ایک اخبار سے منسلک ہیں۔گزشتہ دنوں انہیں راہ گزرتے دو بھارتیوں نے روک کر بدتمیزی شروع کر دی۔

بھارتی میڈیا کے مطابق 2موٹر سائیکل سوار تیز رفتاری سے ان کی جانب آئے اور جبران کی نمبر پلیٹ پر ہیما چل لکھا دیکھ کر کہا کہ ’ ہیما چل واپس جائو‘ ۔

جبران نے جواب دیا کہ ’نمبر پلیٹ ضرور ہیما چل کی ہے پر میں ہوں کشمیریـ‘ اور یہ بات سن کر دونوں آگ بگولہ ہوگئے اور ہاتھا پائی پر اتر آئے۔

جبران نے پولیس کو بتایا کہ ان کی موٹرسائیکل ان نوجوانوں کے درمیان آگئی تھی جس پر وہ دونوں بھڑک اٹھے اورجبران کی موٹر سائیکل کے ساتھ بھی توڑ پھوڑ کی۔

دونوں نوجوانوں کو پولیس نے گرفتار کرلیا ہے اور وہ معافی مانگنے کے لیے بھی تیار ہیں تاہم جبران نے کارروائی روکنے اور مقدمہ واپس لینے کا فیصلہ کر لیا۔

جبران نذیر نے پولیس کو بتایا کہ انہیں نہیں لگتا کہ یہ حملہ کسی تعصب کے باعث پیش آیا بلکہ یہ ایک لاپرواہی اور بدتمیزی کا نتیجہ تھا۔

واضح رہے کہ پلوامہ حملے کے بعد سے بھارت کی انتہا پسندی عروج پر ہے، ان کا کشمیریوں پر تشدد اور بھی بڑھ گیا، لہذا کسی معمولی واقعے کو بھی پلوامہ واقعے سے جوڑنے کی کوشش کی جا رہی ہے۔

تازہ ترین