پاکستان کیخلاف نہ کھیلنے کے فیصلے کو پسند نہیں کرینگے، ٹنڈولکر

سابق بھارتی ٹیسٹ کرکٹر ٹنڈولکر نے کہا ہے کہ اگر بھارت نے پاکستان کے خلاف ورلڈ کپ کا میچ نہ کھیلنے کا فیصلہ کیا تو وہ اس اقدام کو پسند نہیں کریں گے۔

ایک انٹرویو میں سچن ٹنڈولکر نے کہا کہ اگر ورلڈ کپ میں پاکستان کے خلاف بھارت نہیں کھیلے گا تو پاکستان کو بغیر کھیلے ہی دو پوائنٹس مل جائیں گے جو روایتی حریف کو ایونٹ میں آگے بڑھنے میں مدد دے سکتے ہیں، بغیر کھیلے دو پوائنٹس گنوانا اچھا فیصلہ نہیں ہوگا۔

ٹنڈولکر نے کہا کہ وہ اس معاملے پر سُنیل گواسکر کے بیان کی حمایت کریں گے جنہوں نے کہا ہے کہ بہتر یہی ہے کہ ورلڈ کپ میں بھارتی ٹیم پاکستان کے خلاف میچ کھیلے ، اُس میں فتح حاصل کرے تاکہ اُس کو دو پوائنٹس مل سکیں ، بغیر کھیلے دو پوائنٹس گنوانا اچھا فیصلہ نہیں ہوگا۔