اے شریف انسانو

06 مارچ ، 2019

اردو کے ممتازاورترقی پسند تحریک سے تعلق رکھنے والے مشہور شاعرساحر لدھیانوی 8 مارچ 1921ء کو لدھیانہ، پنجاب میں پیدا ہوئے۔انہیں فلموں کے لیے گیت اور نغمے لکھنے سے بھی بہت شہرت ملی۔اگرچہ ساحر کے علاوہ بھی کئی اچھے شعرا نے فلمی دنیا میں اپنے فن کا جادو جگایا، لیکن ساحر کے علاوہ کسی اور کو اتنی مقبولیت حاصل نہیں ہوئی۔ اس کی بنیادی وجہ وہی ہے جو ان کی ادبی شاعری کی مقبولیت کی ہے، یعنی شاعری عوامی، لیکن ادبی تقاضوں کو مدِنظر رکھتے ہوئے۔25 اکتوبر 1980ء کو غمِ دوراں اور جاناں جھیلتےہوئے ان کا ممبئی میں انتقال ہوا۔موجودہ حالات میں یومِ پیدایش پرانہیں خراجِ عقیدت پیش کرنے کے لیےذیل میں پیش کی جانے والی ان کی نظم سے بڑھ کر اور کوئی شئے نہیں ہوسکتی جوانہوں نے بھارت اورپاکستان کی جنگ کے پس منظر میں لکھی اور معاہدہ تاشقند کی سال گرہ پر نشر کی گئی تھی۔

خون اپنا ہو یا پرایا ہو

نسل آدم کا خون ہے آخر

جنگ مشرق میں ہو کہ مغرب میں

امن عالم کا خون ہے آخر

بم گھروں پر گریں کہ سرحد پر

روح تعمیر زخم کھاتی ہے

کھیت اپنے جلیں کہ اوروں کے

زیست فاقوں سے تلملاتی ہے

ٹینک آگے بڑھیں کہ پچھے ہٹیں

کوکھ دھرتی کی بانجھ ہوتی ہے

فتح کا جشن ہو کہ ہار کا سوگ

زندگی میتوں پہ روتی ہے