اسلام آباد یونائیٹڈ نے کراچی کنگز کو ایونٹ سے باہر کردیا

پی ایس ایل سیزن فور کے پہلے ایلیمینیٹر میں دفاعی چیمپئن اسلام آباد یونائیٹڈ نے کراچی کنگز کو چار وکٹوں سے شکست دے کر ایونٹ سے باہر کردیا۔

دوسرے ایلیمنیٹر میں اسلام آباد یونائیٹڈ جمعہ کو پشاور زلمی کا سامنا کرے گی۔

کراچی کنگز نے پہلے بیٹنگ کرتے ہوئے اسلام یونائیٹڈ کو 162 رنز کا ہدف دیا۔

ہدف کے تعاقب میں اسلام آباد یونائیٹڈ کی اننگز کا آغاز مایوس کن رہا اور صرف 19 رنز ان فارم بیٹسمین لیوک رونکی 5 رنز بناکر پویلین لوٹ گئے۔

ڈیلپورٹ اور ہیلز نے ابتدائی نقصان کے باوجود تیزی سے رنز بنائے اور اسکور 63 تک پہنچادیا، ڈیلپورٹ 38رنز بناکر ہیلز کا ساتھ چھوڑ گئے، ان کی اننگز میں 2چھکے اور 4 چوکے شامل تھے۔

اسی اوور میں عمر خان نے والٹن کو بغیر کھاتہ کھولے پویلین کی راہ دکھادی۔

کراچی کے لئے خطرہ بنتے جارہے ایلکس ہیلز 41 رنز پر عامر یامین نے بابراعظم کے ہاتھوں کیچ آؤٹ کرایا۔

ہیلز کے آؤٹ ہونے کے بعد اسلام آباد کی تمام تر امیدیں حسین طلعت کے ساتھ وابستہ ہوگئیں، لیکن وہ چھکا لگانے کی کوشش میں باؤنڈری پر کھڑے بابر اعظم کو کیچ دے بیٹھے، یہ بابر اعظم کا اننگز میں چوتھا کیچ تھا۔

حسین طلعت نے 19گیندوں پر تین چھکوں اور ایک چوکے کی مدد سے 32 رنز بنائے۔

آصف علی کی کریز پر موجودگی کی بدولت اسلام آباد کی جیت کے امکانات اب بھی باقی تھے۔

اسلام آباد کو آخری اوور میں 6 رنز کی ضرورت تھی، آصف علی نے محمد عامر کی پہلی ہی گیند پر چھکا لگا کر ٹیم کی جیت یقینی بنائی۔

اسلام آباد نے مطلوبہ ہدف بیسویں اوور کی تیسری گیند پر حاصل کر کراچی کو ایونٹ سے باہر کردیا۔

کراچی کنگز کے عامر یامین اور عمر خان نے دو، دو جبکہ عثمان شنواری نے ایک وکٹ حاصل کی۔

کراچی کنگز کا 162 رنز کا ہدف

اس سے قبل پی ایس ایل کے پہلے ایلیمینٹیر میں کراچی کنگز نے اسلام آباد یونائیٹڈ کو جیت کے لئے 162 رنز کا ہدف دیا۔

پی ایس ایل کے پہلے ایلیمینیٹر میں کراچی کنگز کے اوپنرز بابراعظم اور کولن مونرو نے شاندار آغاز فراہم کیا اور حالیہ سیزن کی تیز ترین 50 رنز کی شراکت بنائی۔

دونوں بیٹسمینوں نے پہلی وکٹ کی شراکت میں 52 رنز بنائے، مونرو صرف 11 گیندوں پر ایک چھکے اور چھ چوکوں کی مدد سے 32 رنز بناکر آؤٹ ہوئے۔

مونرو کے آؤٹ ہونے کے بعد لیونگ اسٹون بیٹنگ کے لئے برق رفتاری سے اسکور میں اضافہ کیا اور بابر اعظم کے ساتھ مل کر دوسری وکٹ کی شراکت میں بھی 50 رنز بناکر اسکور 102 تک پہنچادیا۔

لیونگ اسٹون 25 گیندوں پر 30 رنز کی اننگز کھیل کر شاداب خان کا شکار ہوگئے۔

اسکور میں صرف 4 رنز کا ہی اضافہ ہوا تھا کہ بابر اعظم 42 رنز بناکر رُمان رئیس کی گیند پر وکٹ کے پیچھے کیچ آؤٹ ہوگئے۔

انگرام کو 23 رنز پر محمد موسیٰ نے آصف علی کے ہاتھوں کیچ آؤٹ کرایا۔ افتخار احمد صرف ایک رن بناسکے۔ عامر یامین کو ایک کے اسکور پر محمد سمیع نے رن آؤٹ کردیا۔