’’شیخ رشید کو جواب دیا تو ان کی اہمیت بڑھ جائے گی‘‘

18 مارچ ، 2019

پیپلز پارٹی کے رہنما سید خورشید شاہ کہتے ہیں کہ شیخ رشید کو کوئی جواب نہیں دوں گا،انہیں کوئی جواب دوں گا تو ان کی اہمیت بڑھ جائے گی۔

رہنما پیپلزپارٹی خورشید شاہ نے کراچی میں میڈیا سے گفتگو کرتے ہوئے سوال کیا کہ حکومت نام لے کہ کس نے این آر او مانگا ہے؟

ان کا کہنا ہے کہ لگتا ہے کہ ملک میں کوئی جمہوریت نہیں جس کو چاہو پکڑو بعد میں پوچھا جائے گا، ملک میں جمہوریت کے نام پر آمریت ہے،مہنگائی کا عذاب ہے۔

خورشید شاہ نے کہا کہ چاہتے ہیں کہ بیٹھ کر بات کریں، قانون سازی کریں، اب یہ ہو رہا ہے کہ کیس بناؤ، گرفتار کرو پھر دیکھا جائے گا۔

انہوں نے مزید کہا کہ قانون کسی پارٹی کے لیے نہیں ملک کے لیے ہوتا ہے، حکومت نے ایک کروڑ نوکریوں، 50لاکھ گھروں کی بات کی تھی مگر کوئی پلاننگ نظر نہیں آ رہی ہے۔

پی پی پی رہنما سید خورشید شاہ نے یہ بھی کہا کہ عمران خان پہلے وزیر اعظم ہیں جو آئی ایم ایف کے پاس خود چل کر گئے ہیں۔

تازہ ترین