کیس منتقلی روکنے کی درخواست مسترد، ضمانت منظور

سندھ ہائی کورٹ نے جعلی اکاؤنٹس کیس اسلام آباد منتقل کرنے کے بینکنگ کورٹ کے فیصلے پر حکمِ امتناع دینے کی آصف زرداری اور فریال تالپور کی درخواست مسترد کردی تاہم دونوں ملزمان کی ضمانت قبل از گرفتاری کی درخواست منظور کر لی۔

سندھ ہائی کورٹ میں آصف زرداری اور فریال تالپور کی بینکنگ کورٹ کے فیصلے کے خلاف اپیل پر سماعت ہوئی اور اس سلسلے میں پیپلز پارٹی کی طرف سے وکیل فاروق ایچ نائیک عدالت میں پیش ہوئے۔

فاروق ایچ نائیک نے عدالت میں مؤقف اختیار کیا کہ بینکنگ کورٹ میں چیئرمین نیب نے کیس منتقلی کی درخواست دائر کی تھی، سپریم کورٹ نے اس کیس کو راولپنڈی منتقل کرنےکا کوئی حکم نہیں دیاتاہم نیب نے سپریم کورٹ کے فیصلے کی غلط تشریح کی۔

چیف جسٹس سندھ ہائی کورٹ نے فاروق ایچ نائیک سے پوچھا کہ کیا آپ نے سپریم کورٹ میں یہ نقطہ اٹھایا تھا؟

فاروق نائیک نے جواب دیا کہ یہ معاملہ تھا ہی نہیں، سپریم کورٹ نےجب درخواستوں کو نمٹا دیا تو چیئرمین نیب نے بینکنگ کورٹ میں درخواست دی۔

فاروق ایچ نائیک نے عدالت سے کیس کا پورا ریکارڈ طلب کرنے کی استدعا کی جس پر عدالت نے ریکارڈ طلب کرنے کی زبانی درخواست مسترد کردی اور نیب کو 26 مارچ کے لیے نوٹس جاری کر دیا۔

عدالت نے آصف زرداری اور فریال تالپور کے وکیل فاروق ایچ نائیک کی جانب سے بینکنگ کورٹ کے فیصلے پر حکم امتناع دینے کی درخواست بھی مسترد کر تے ہوئے کہا کہ فریقین کو سننے کے بعد اس پر فیصلہ کریں گے۔

زرداری نے نیب کا کال اپ نوٹس بھی چیلنج کر دیا

سابق صدر اور پیپلز پارٹی کے شریک چیئرمین آصف علی...

دوسری جانب نیب کے آصف زرداری اور بلاول بھٹو کو 20 مارچ کوطلب کرنے کے کال اپ نوٹس کو آصف زرداری نے ہائی کورٹ میں چیلنج کر دیا ہے۔

سندھ ہائی کورٹ کے 2 رکنی بینچ نے آصف زرداری اور فریال تالپور کی حفاظتی ضمانت کی درخواست پر سماعت کی، اس موقع پر سابق صدر بھی سندھ ہائی کورٹ میں پیش ہوئے۔

آصف زرداری اور فریال تالپور کے وکیل فاروق ایچ نائیک نے عدالت میں مؤقف اختیار کیا کہ آصف زرداری کو نیب کی طرف سے کال اپ نوٹس جاری کیا گیا ہے، نیب میں پیشی کے موقع پر آصف زرداری کی گرفتاری کا خدشہ ہے لہٰذا ان کی حفاظتی ضمانت منظور کی جائے۔

عدالت نے نیب انکوائری میں آصف زرداری اور فریال تالپور کی 10 روز کی عبوری ضمانت منظور کرتے ہوئے ملزمان کو 10،10 لاکھ روپے زر ضمانت جمع کرانے کا حکم دے دیا۔

واضح رہےکہ کراچی کی بینکنگ کورٹ نے جعلی اکاؤنٹس کیس کو اسلام آباد منتقل کرنے کا حکم دیا تھا۔

گزشتہ روز ایف آئی اے نے عدالتی حکم کی تعمیل کرتے ہوئے کیس کا ریکارڈ اسلام آباد کی احتساب عدالت میں جمع کرادیا ہے۔

آصف زرداری اور فریال تالپور نے کیس کی منتقلی کا حکم سندھ ہائی کورٹ میں چیلنج کیا ہے۔