’’عالمی برادری کشمیر میں جاری ریاستی دہشتگردی پر بھی توجہ دے‘‘

اقوام متحدہ میں پاکستان کی مستقل مندوب ملیحہ لودھی کا کہنا ہے کہ عالمی برادری کو کشمیر میں جاری بربریت اور ریاستی دہشت گردی پر بھی توجہ دینی چاہیے۔

ملیحہ لودھی سلامتی کونسل میں دہشت گردی کے روک تھام پر منعقد ہونے والے اجلاس سے خطاب کر رہی تھیں۔

انہوں نے کہا کہ یو این کے اداروں کو چند ممالک کے سیاسی مفادات کے فروغ کا آلہ کار نہیں بننا چاہیے، غاصبانہ تسلط اور حق خود ارادیت کے انکار سے پیدا ہونے والی صورت حال پر بھی توجہ دینی چاہیے۔

اقوام متحدہ میں پاکستان کی مستقل مندوب نے کہا کہ ہمیں دہشت گردی کی علامات سے نہیں بلکہ وجوہات سے نبرد آزما ہونے کی ضرورت ہے۔

انہوں نے مزید کہا کہ پاکستان نے دہشت گردی کے خلاف جنگ میں خاطر خواہ کامیابیاں حاصل کی ہیں،دہشت گرد تنظیموں کی مالی معاونت روکنے کے لیے اداروں کو فعال بنایا گیا ہے۔

ملیحہ لودھی نے یہ بھی کہا کہ پاکستان میں نیشنل ایکشن پلان کے ذریعےانسدادِ دہشت گردی کی مربوط اور جامع پالیسی بنائی گئی ہے۔