ٹرمپ کے بیان پر انکی ترجمان کا دفاع

15 اپریل ، 2019

امریکی صدر ڈونلڈ ٹرمپ کی ترجمان سارہ سینڈرز نے اپنے صدر کے اقدامات کا دفاع کرتے ہوئے کہا ہے کہ انہوں نے مسلم رکن کانگریس الہان عمر کے خلاف لوگوں کو تشدد پر نہیں اکسایا۔

ٹرمپ نے اپنے ایک ٹوئٹ میں مسلم خاتون الہان عمر اور نائن الیون کی ویڈیو کو یکجا کرکے پیش کیا جس کے بعد اس متنازع وڈیو کے حوالے سے ان پر کئی اطراف سے الزامات عائد کیے گئے۔

اس وڈیو سے متعلق بعض افراد کا کہنا تھا کہ ٹرمپ لوگوں کو رکن کانگریس الہان عمر کے خلاف تشدد پر ابھار رہے ہیں، یہ بات کرنے والوں میں امریکا کی سب سے طاقت ور ڈیموکریٹ شخصیت اور اسپیکر نینسی پلوسی بھی شامل تھیں۔

پلوسی نے واضح بیان دیا تھا کہ انہوں نے الہان کے تحفظ کے لیے سیکورٹی حکام سے بات کی ہے اور ٹرمپ پر زور دیا ہے کہ وہ اس کلپ کو ہٹا دیں۔

واضح رہے کہ الہان عمر نے اپنے ایک بیان میں نائن الیون والے واقعے کو کہا تھا کہ ’’وہ کچھ لوگوں کی جانب سے کیا گیا ایک واقعہ تھا‘‘ جس پر صدر ٹرمپ نے نائن الیون کے واقعات کی وڈیو میں الہان عمر کے بیان کی وڈیو شامل کرکے پیش کی تھی اور آخیر میں کہا گیا تھا ’’نائن الیون ہمیں یاد ہے‘‘۔

تازہ ترین