’’بزدل دہشتگردوں نے بے گناہ نہتے مسافروں کو قتل کیا‘‘

18 اپریل ، 2019

وزیر اعلیٰ بلوچستان جام کمال خان نے اورماڑہ فائرنگ کے واقعے کی شدید مذمت کرتے ہوئے کہا ہے کہ بزدل دہشت گردوں نے بے گناہ نہتے مسافروں کو قتل کرکے بربریت کی انتہا کی۔

اپنے مذمتی بیان میں انہوں نے کہا ہے کہ امن کے دشمن اپنے بیرونی آقاؤں کے اشارے پر اپنے ہی لوگوں کا خون بہا رہے ہیں، صوبے کے عوام کی تائید وحمایت سے دہشت گردی کا خاتمہ کیا جائے گا۔

وزیراعلیٰ بلوچستان نے کہا کہ بلوچستان کے عوام بیرونی عناصر کے ایجنڈے پر عمل پیرا دہشت گردوں کو نفرت کی نگاہ سے دیکھتے ہیں۔

انہوں نے مزید کہا کہ دہشت گردی کا یہ واقعہ ملک کو بدنام کرنے اور بلوچستان کی ترقی کو روکنے کی گھناؤنی سازش ہے۔

وزیر اعلیٰ بلوچستان نے یہ بھی کہا کہ ترقی اور امن کا سفر ہر صورت جاری رہے گا، صوبے کے عوام کی تائید و حمایت سے دہشت گردی کا خاتمہ کیا جائے گا اور دہشت گردوں کو کیفرِ کردار تک پہنچانے کا عمل جاری رہے گا۔

واضح رہے کہ آج اورماڑہ کے قریب مکران کوسٹل ہائی وے پر نامعلوم مسلح ملزمان نے بس کے مسافروں کو اتار کر ان پر فائرنگ کر دی جس کےنتیجے میں 14 افراد جاں بحق ہو گئے۔

تازہ ترین