کوئی امید بر نہیں آتی

گل و خار … سیمسن جاوید
دینِ اسلام اور عرب ممالک کی مثالیںدے کر لوگ کہتے ہیںکہ پاکستان میں اقلیتیں آزاد ہیں۔عرض یہ ہے کہ پہلے تاریخ ِ عالم کا مطالعہ کرناانتہائی ضروری ہے تاریخ میں جھانکنے سے پتہ چلتا ہے کہ اْس وقت تمام عرب ممالک میں بنی اسرائیل موجود تھے جو ایک خدا ، اْس کے احکام اور شریعت کو مانتے تھے۔وہاں دوسری اقوام بھی تھیں جو غیر معبودوں کی پرستش کرتی تھیں۔دنیا چھوٹی چھوٹی ریاستوں میں تقسیم تھی ۔ہر کوئی اپنی سلطنت بڑھانے کے لئے جنگ و جدل اورظلم و جبر کا راستہ اپنا ئے ہوئے تھا۔ تاریخ اس بات کی گواہ ہے کہ جب جب اسرائیل نے خدا کی نافرمانی کی خدا نے انہیں سزا کے طور پرغیر اقوام کی غلامی میں دے دیا۔ پھرجب انہوں نے توبہ کی تو خدا نے انہیں بحال کیا ۔یہ گناہ اور توبہ ہی کی کڑی ہے کہ کس طرح حضرت موسیٰ نے بنی اسرائیل کو فرعون کی غلامی سے آزاد کرایا ۔اسی دور میں سلطنتِ روم معرضِ وجود میںآئی جس کا راج پوری دنیاپر رہااور بنی اسرائیل رومی سلطنت میں غلاموں جیسی زندگی گزارتے رہے۔ایک طرف شہنشاہ اوگستس( قیصر) کی حکومت تھی تو دوسری طرف ہیرودیس کی ، جو یہودویوں کا محدود اختیار رکھنے والابادشاہ تھا ۔اْس وقت کامعاشرہ بہت سی لسانی گروہوں میں تقسیم تھا۔یہودی ان میں اعلیٰ اور سامری حقیر سمجھے جاتے تھے۔ایسے میں جب یسوع المسیح کی پیدا ئش واقع ہوئی تو مسیحیت کا آغاز ہوا ،جومحبت ،صلح پسند اور امن سے سرشار تھے۔دیکھتے ہی دیکھتے سلطنت ِروم بھی مسیحیت میںبدل گئی۔ روم کے علاوہ تمام عرب ممالک میں مسیحیت تیزی سے پھیل گئی۔570AD میں رسول پاک ﷺنے قریش خاندان میں جنم لیا۔اور 630 میں اسلام ایک بڑا مذہب بن کر سامنے آیا۔اس وقت پوری دنیا میں مسیحی مذہب پہلے اور اسلام دوسرے نمبر پر ہے۔ تاریخ صحیح طورپرہماری رہنمائی نہیں کرتی کہ عرب ممالک میں مسیحیت کیوں زوال پزیر ہوئی ۔یہ بھی سچ ہے کہ مذاہب کے درمیان بڑھتی ہوئی کشیدگی کے پیش نظر مسیحیوں نے عرب کے ان علاقوں سے ہجرت کرنا شروع کردی تھی جہاں اسلام کا غلط استعمال ہو رہا تھا۔انہوں نے عرب کے ان علاقوں کی طرف رخ کر لیاجہاںانہیں مذہبی آزادی اوربھائی چارے کی فضا ملی۔اْن عرب ممالک میں آج بھی مسیحی اور مسلم بھائی چارے کی بہترین مثال ملتی ہے ۔موجودہ دور میں بعض عرب ممالک میں اقلیتیں موجود ہی نہیں۔ سعودی عرب میںجہاں چرچ بنانے کی اجازت نہیں تھی، اب ویٹی کن کے ساتھ چرچ بنانے کا معاہدہ طے پایا ہے۔لہٰذا پاکستان میں اقلیتوں کے حقوق کے تناظر میںعرب ممالک کی اقلیتوں کا حوالہ دینا مناسب نہیں ہے ۔ یونائیٹڈ نیشنل چارٹر پوری دنیا میں رہنے والی اقلیتوں کے حقوق کے بارے میں پریشانی کا اظہار کرتا ہے۔اس کے ساتھ ہی یورپین یونین کا ادارہ بھی نہ صرف اقلیتوں کی فلاح و بہبود اور حقوق کے لئے فنڈنگ کرتا ہے بلکہ مانیٹرنگ بھی کرتا ہے۔جسے بعض اوقات مولانا حضرات اندونی مداخلت کا نام بھی دیتے ہیں۔ حالانکہ جن عرب ممالک میں مسیحی موجودہیں وہاںکوئی اقلیت کے نام سے آشنا نہیں۔ وہ بہن بھائیوں کی طرح پیار و محبت سے رہ رہے ہیں۔وہاں تبدیلی ِ مذہب کے واقعات سننے میں نہیں آتے۔ عراق و شام جہاں ابتدائی مسیحیوں کی کثیر تعداد آباد تھی وہاں ISIS نے مسیحیوں کی آبادیوں کوتباہ و برباد کر دیا اور ان کی عبادت گاہوں کو سخت نقصان پہنچایا۔آج ضرورت اس امر کی ہے کہ ہم مذہبی تعصب سے بالاتر ہو کر مذہبی اقلیت کے سوال کو چھوڑ کر بلا تفریق انسانوں کو جینے کا حق دیں۔جبراً تبدیلی مذہب اورجبری نکاح جیسے عمل کی کوئی بھی مذہب اجازت نہیں دیتا ۔ ایک طرف ہم اقلیتوں کی پاکستان میں مکمل آزادی کا دعویٰ کرتے ہیں تو دوسری طرف قانون اور ہمارے اعمال میںبہت بڑا تضاد ہے۔ تبدیلیِ مذہب و نکاح کے واقعات آج کی بات نہیں مگرسوشل میڈیا کے مطابق جو اس وقت سب سے زیادہ باخبرادارہ ہے ، اس سال کچھ زیادہ ہی مسیحی کمسن لڑکیو ں کواً تبدیلی مذہب کا سامنا کرنا پڑا ہے۔جب بات حد سے آگے بڑھ گئی۔تو ہندوبھی کھل کر سامنے آئے جوغالباً سندھ میں سب سے زیادہ متاثر ہورہے ہیں۔ان کے ساتھ ساتھ مسیحی بھی جن کا پاکستان کی تعمیر و ترقی میں سب سے زیادہ حصہ ہے۔ تبدیلی مذہب و نکاح کے خلاف احتجاج میں شامل ہیں۔ اس احتجاج میں ہندوکمیونٹی کے رمیش کمار،نندکمار ، کرشنا کماری اور دوسرے لیڈرز اور مسیحی انسانی حقوق ،سوشل جسٹس کی تنظیمیں،سیاسی و سول سوسائٹی کے لیڈر بھی سامنے آئے ہیں۔ گویا صوبائی سطح پر جبراً تبدیلی مذہب و نکاح کے بل کو قانونی شکل دی جانے کے لئے کوششیں کی جارہی ہیں۔میرج ایکٹ کے تحت لڑکی کی عمر18 اور لڑکے کی عمر 16 سال ہے مگر اس پر عمل درآمد نہیں ہو رہا۔لا علمی کی انتہا ہے کہ لوگ اپنے بچوں کا نادراکے دفتر میںاندراج نہیں کر واتے ۔ ایسے واقعات میں عدالتیں عمر کے ثبوت کے طور پر چرچ یا سکول کےسرٹیفکیٹ کو ترجیح نہیں دیتیں اور عدالت ہڈیوں کے ٹیسٹ سے عمر کا تعین کر وا رہی ہے۔اس کا نتیجہ کیا ہو سکتا ہے اس پرتبصرہ کرنا مشکل ہے۔ اس صورت حال کے پیش نظر اقلیتوں نے اسلامک آئیڈیالوجی کونسل سے رجوع کیا۔ پی ٹی آئی ہیومن رائٹس پارلیمنٹیرین کمیٹی کی چیئرپرسن شنیلا روت اور رمیش کما ر نے قومی اسمبلی میں جبراً تبدیلی مذہب و نکاح کا بل سیکریٹریٹ میں جمع کر وادیا ہے۔ امید ہے کہ یہ بل جلد قومی اسمبلی میں پیش کر دیا جائے گا۔ اسی سلسلے میںگذشتہ ماہ اسلام آباد میں ایک سیمینار بھی منعقد ہواجس میں پاکستان انسٹیٹیوٹ فار پارلیمنٹری سروس کے سربراہ ، اسلامی نظریاتی کونسل ،انسانی حقوق ،سوشل جسٹس کی تنظیمیں،مسیحی قومی وصوبائی ارکان کے علاوہ سیاسی و سول سوسائٹی کے لیڈر ز نے بھی شرکت کی ۔اسلامک نظریاتی کونسل نے برملا اظہار کیا کہ اسلام میں جبری تبدیلی مذہب و نکاح کی قطعاً اجازت نہیںاور نہ ہی اس کی حوصلہ افزائی کی جاتی ہے۔اس کامیاب سیمینار کے انعقاد کے بعد اسلامک نظریاتی کونسل سے بڑی امیدیں وابستہ کی جا رہی ہیںکہ وہ جلد اپنی سفارشات حکومت کو پیش کر دے گی۔ڈس انفارمیشن کا عالم یہ ہے کہ کچھ ایکٹیوسٹ کی جانب سے یہ بھی سننے میں آیا کہ اسلامک نظریاتی کونسل نے اپنی سفارشات حکومت کو پیش کر دی ہیںجس میں یہ سفارش بھی کی گئی ہے کہ مذہب تبدیل کرنے والے کے لئے ایک سال اسلامی تعلیم لینا لازمی ہوگا۔وغیرہ وغیرہ ۔جب میں نے اس خبر کی سچائی جاننے کے لئے لاہور میں موجود کچھ دوستوں سے رابطہ کیا جن کے اسلامک نظریاتی کونسل سے قریبی تعلقات ہیں تو اس میں کوئی سچائی سامنے نہیں آئی۔البتہ ہمیں کسی بڑی خوش فہمی میں مبتلا ہونے کی بجائے پاکستان میں تمام اقلیتوں اور سیاسی، سماجی و مذہبی لیڈر شپ کو لے کر آگے بڑھنا ہوگا۔انفرادی کوشش کی بجائے اجتماعی کوششوں کو تیز کرنا ہوگا ۔سچ تو یہ ہے کہ پورے کے پورے معاشرے کی اصلاح ہونے والی ہےجس کے لئے قانون اور قانون پر عمل درآمد کروانے والوں کوسخت ہونا پڑے گا۔جہاں حکومت کمزور اور مذہبی جماعتیں طاقتوار ہو ںوہاں حقوق آسانی سے نہیں ملتے ۔ تاریخ کے حقائق کو بھی توڑ مروڑ کر پیش کیا جاتا ہے۔جہاں مستقبل کے مورخ تعصب سے کام لیں وہاں امیدیں بھر نہیں آتیں۔