نیب نے زرداری کیخلاف انکوائری رپورٹ عدالت میں جمع کرا دی

14 مئی ، 2019

قومی احتساب بیورو (نیب) نے جعلی بینک اکاؤنٹس کیس میں سابق صدر اور پیپلز پارٹی کے شریک چیئرمین آصف علی زرداری کے خلاف انکوائریز اور انویسٹی گیشنز کی رپورٹ اسلام آباد ہائی کورٹ میں جمع کرا دی۔

ڈپٹی پراسیکیوٹر جنرل نیب سردار مظفر عباسی نے عدالت میں رپورٹ جمع کرائی۔

عدالت نے 29 اپریل کو آصف علی زرداری کی درخواست پر تمام کیسز کی تفصیلات طلب کی تھیں۔

عدالتی حکم پر آصف علی زرداری کے وکلاء کو بھی نیب رپورٹ کی پیشگی کاپی بھجوا دی گئی۔

نیب کی عدالت میں جمع کرائی گئی رپورٹ میں کہا گیا ہے کہ جعلی بینک اکاؤنٹس سے متعلق انکوائریز سپریم کورٹ کے حکم پر شروع کی گئیں۔

نیب رپورٹ میں کہا گیا ہے کہ نیب کی 5 انکوائریز اور 3 انوسٹی گیشنز میں آصف علی زرداری کا کردار سامنے آیا ہے، سابق صدر کے ابھی تک صرف ایک کیس میں وارنٹ گرفتاری جاری کیے گئے۔

نیب رپورٹ میں یہ بھی کہا گیا ہے کہ آصف علی زرداری کے خلاف ابھی تک دو ریفرنسز دائر کیے گئے ہیں، ان کے خلاف 6ریفرنسز ابھی انکوائری یا انویسٹی گیشن کے مرحلے میں ہیں۔

تازہ ترین