’ایمنسٹی اسکیم میں ابہام ہے نہ ہی تبدیل ہوگی‘

چیئرمین ایف بی آر شبر زیدی نے کہا ہے کہ ایمنسٹی میں کسی قسم کا نہ تو ابہام ہے نہ ہی اسکیم میں کوئی تبدیلی لائی جا رہی ہے۔

کراچی چیمبر میں خطاب کے دوران شبر زیدی نے کہا کہ چند خام مال پر تو ریلیف دیا جاسکتا ہے سب پر ٹیکس چھوٹ نہیں ملےگی۔

انہوں نے تاجروں سے کہا کہ مجھے لمبے عرصے کی اصلاحات کرنی ہیں، بہتر تجاویز دیں، اس پر عمل کروں گا، آپ ٹیکس کم کرنے کا حل بتادیں،میں بجٹ سے پہلے آپ کا مسئلہ حل کر دوں گا۔

چیئرمین ایف بی آر نے مزید کہا کہ ہماری انڈسٹری کو فراڈ کیلئے استعمال کیا گیا، افغان ٹرانزٹ ٹریڈ کے علاوہ بھی اسمگلنگ ہو رہی ہے۔

شبر زیدی نے یہ بھی کہا کہ غلطیاں ہمارے لوگوں کی بھی ہیں، اسمگل اشیاء بیچنا بھی شرعی اصولوں کے خلاف ہے۔