فرشتہ کے لواحقین کو 20 لاکھ دینے کی منظوری

23 مئی ، 2019

اسلام آباد میں دس سالہ بچی فرشتہ کو اغوا کرنے کے بعد زیادتی کا نشانہ بنانے اور قتل کردینے کے معاملے میں حکومت نے فرشتہ کے لواحقین کو بطور مالی امداد 20 لاکھ روپے دینے کی منظوری دے دی۔

فرشتہ کے اہل خانہ کو 20 لاکھ روپے دینے کا نوٹیفکیشن بھی جاری کر دیا گیا ہے۔

مقتول بچی کے لواحقین کی مالی مدد کا مطالبہ احتجاج کو ختم کرنے کے مذاکرات میں کیا گیا تھا۔

واضح رہے کہ 10 سالہ فرشتہ کو اسلام آباد میں اس کے گھر کے باہر سے اغوا کیا گیاتھا، جس کے 10 دن بعد اس کی لاش ملی تھی۔

وزیر اعظم عمران خان نے گزشتہ روز فرشتہ کے قتل کا ایکشن لیتے ہوئے متعلقہ ڈی ایس پی عابد کو معطل اور ایس پی عمر خان کو او ایس ڈی بنا دیا تھا۔

ذرائع کا کہنا ہے کہ وزیر اعظم نے آئی جی اسلام آباد عامر ذوالفقار اور ڈی آئی جی آپریشنز وقار الدین سید سے بھی معاملے پر وضاحت طلب کرلی تھی۔

بچی کی تلاش اور مقدمہ درج کرنے میں تاخیر کرنے والے ایس ایچ او شہزاد ٹاؤن اور دیگر اہلکاروں کے خلاف مقدمہ درج کیا گیا تھا۔

ادھر سماجی رابطے کی ویب سائٹ ٹوئٹر پر پاک فوج کے ترجمان میجر جنرل آصف غفور نے بچی فرشتہ کو زیادتی کے بعد قتل کرنے کے واقعے کی شدید مذمت کی تھی۔

ڈی جی آئی ایس پی آر میجر جنرل آصف غفور نے کہا کہ واقعے کے ذمہ داروں کو انصاف کے کٹہرے میں لایا جائے، پاک فوج اس معاملے پر ہر قسم کی مدد کےلیے تیار ہے۔

تازہ ترین