’’جو اِن سےکرپشن کا حساب مانگے وہ نالائق ہے‘‘

وزیراعظم کی معاون خصوصی فردوس عاشق اعوان کا کہنا ہے کہ جو ان سےکرپشن کا حساب مانگے وہ نالائق ہے اور نااہل بھی ہے۔

فردوس عاشق اعوان نے مسلم لیگ نون کے رہنماؤں کی میڈیا سے گفتگو پر اپنے ردعمل کا اظہار کرتے ہوئے کہا کہ ان کی نظرمیں لائق وہ ہے جو انہیں منی لانڈرنگ کے نت نئے طریقے بتائے۔

انہوں نے کہا کہ نالائق اعظم اور پاکستان اکٹھے نہیں چل سکتے اسی لئے ایک جیل میں ہے دوسرا باہربھاگ گیا، تیسرا سمدھی ملکی معیشت کو چونا لگا کر مفرور ہے۔

فردوس عاشق اعوان نے مزید کہا کہ عمران خان کی قیادت میں قوم نے کرپشن اورمعاشی بدحالی کے کینسرکا علاج کرنے کا فیصلہ کیا ہے۔

انہوں نے یہ بھی کہا کہ وہ وقت دور نہیں جب معیشت بھی چلے گی اور عوام خوشحال ہوں گے، اسٹاک مارکیٹ کا ہزار پوائنٹس سے زائد اوپر جانا مثبت ہے، وہ اپوزیشن کو نظر نہیں آتا۔