بوجھو تو زرا یہ پہیلیاں !!!

بات انوکھی کیا کوئی جانے

اِک ڈبیا میں سینکڑوں دانے

میٹھے میٹھے، رنگ رنگیلے

رس بھرے، رس دار ، رسیلے

کوئی چُوسے ، کوئی چبائے

بچّہ بوڑھا ہر اِک کھائے

۔۔۔۔۔۔۔۔۔۔۔۔۔۔۔۔۔۔۔۔

جانے کس شے کا ہے سایا

بادل سا بن کر لہرایا

اڑتا جائے ، اڑتا جائے

طرح طرح کی شکل بنائے

پکڑو تو وہ ہاتھ نہ آئے

۔۔۔۔۔۔۔۔۔۔۔۔۔۔۔۔۔۔۔۔

ہر دم پیار لٹانے والی

ہر پل ناز اُٹھانے والی

ہم سب کے آرام کی خاطر

اپنا چین گنوانے والی

۔۔۔۔۔۔۔۔۔۔۔۔۔۔۔۔۔۔۔۔

ریشم جیسے بال ہیں اُس کے

نرم بہت ہی گال ہیں اُس کے

کان ہیں چھوٹے، مونچھیں لمبی

ناک ہے چپٹی، دُم ہے موٹی

۔۔۔۔۔۔۔۔۔۔۔۔۔۔۔۔۔۔۔۔

گلشن کی پہچان ہے اُس سے

گل دانوں میں جان ہے اُس سے

اُس کے بنا ہر سیج ادھوری

ہر محفل کی شان ہے اُس سے

۔۔۔۔۔۔۔۔۔۔۔۔۔۔۔۔۔۔۔۔۔۔

پہیلیوں کے جوابات

1۔انار 2۔دھواں3 ۔ ماں 4 ۔بلی5 ۔ پھول