شرارتی بندر

مشاہد رضوی

ایک جنگل میں بندروں کی ایک ٹولی رہتی تھی ۔ اس ٹولی میں دو بچّے بھی تھے ، جو اتنے شرارتی تھے کہ ان کے ماں باپ بھی ان سے بہت تنگ آگئے تھے۔

اسی جنگل میں ایک ننھا زرافہ بھی رہتا تھا۔ وہ بہت ہی سیدھا سادا اوربھولا بھالا تھا۔ ایک مرتبہ چرتے چرتے وہ جنگل کے اس حصے میں آگیا، جہاں بندروں کی یہ ٹولی درختوں سے پتّے اور پھل فروٹ توڑ توڑ کر کھانے میں مگن تھی ۔دونوں چھوٹے شرارتی بندروں نے زرافہ کو دیکھا تو انھیں حیرت ہوئی کیوں کہ انہوںنے کبھی ایسا کوئی بھی جانور نہیں دیکھا تھا۔

بندر کے ایک بچّے نے کہا،’’ ارے! دیکھو تو کتنا عجیب و غریب جانور ہے ، آؤ اسے چھیڑتے اور ستاتے ہیں۔‘‘

دونوں بندر کودتے پھلانگتے اس درخت پر پہنچ گئے، جس کے نیچے کھڑے ہوکر زرافہ پتے کھارہا تھا۔ اس درخت کی ایک شاخ پر بیٹھ کر دونوں نے زرافہ سے کہا،’’ اے لمبو! تیرا کیانام ہے؟‘‘

زرافہ نے بڑی نرمی سے کہا،’’ مَیں زرافہ ہوں ،کیا مجھ سے دوستی کروگے ؟ تم لوگوں کے نام کیا ہیں ؟‘‘

دونوں بندر شرارت سے کھلکھلا کر ہنس پڑے او رکہنے لگے کہ ،’’ تجھ سے ہم کیوں دوستی کرنے لگے؟ کتنے بد صورت ہو، مینا رکے جیسی گردن اور سیڑھی کے جیسے پیر۔ ہمیں نہیں کرنا ایسے بے ڈھنگے جانور سے کوئی دوستی ‘‘ اتناکہہ کر دونوں بندر زرافہ کو چڑانے لگے۔ اتناہی نہیں ایک بندر نے درخت سے ایک پکا ہوا پھل توڑ کر زرافہ پر پھینک مارا۔ پھل زرافہ کے منہ پر لگ کر پھوٹ گیا اور اس کا رس اور گودا زرافہ کے چہرے پر پھیل گیا۔ یہ دیکھ کر دونوں بندر قہقہہ مار کر ہنسنے لگے اور کود تے پھلانگتے بھاگ گئے۔

زرافہ بے چارہ روہانسا ہوکر رہ گیا اور منہ لٹکائے وہاں سے چلا گیا۔

ایک دن دونوں شرارتی بندر وں نے یہ طَے کیا کہ وہ جنگل میں دور تک اکیلے گھومنے اور سیر سپاٹا کرنے کے لیے جائیں گے۔ کیوں کہ وہ لوگ اپنی ماں باپ کی ہر وقت کی ڈانٹ پھٹکار سے بے حد تنگ آگئے تھے۔صبح صبح جب باقی بندر سورہے تھے ، یہ دونوں شرارتی بندرچپکے سے نکل پڑے ۔ کچھ ہی دیر میں وہ بندروں کی ٹولی سے بہت دور نکل گئے۔ جب انھیں زور کی بھوک لگی تو ان دونوں نے پیڑوں کی پتیاں اور پھل فروٹ کھاکر اپنی پیٹ کی آگ بجھائی ۔ انھیں اس طرح گھومنے پھرنے اور موج مستی کرنے میں بڑا مزہ آرہا تھا۔

دوپہر ہوگئی تھی۔ وہ دونوں گرمی سے بچنے کے لیے ایک درخت کی ہری بھری شاخوں پر جاکر بیٹھ گئے ، اُس درخت کے نیچے ایک شیر آرام کررہا تھا۔اور پیڑ کے آس پاس ایک بڑا ہرا بھرا میدان تھا اور میدان کے کنارے ایک ندی بہہ رہی تھی۔ بندراُس سہانے منظر میں ایسا کھوئے کہ انھیں اس بات کا احساس ہی نہ ہوا کہ یہاں ایک شیر بھی موجود ہے۔ لیکن جب شیر نے اُس کے چہرے پر بیٹھی ہوئی مکھیوں کو اڑانے کے لیے غرایا تو بندروں نے شیر کو دیکھ لیا۔ شیر کو دیکھتے ہی وہ بری طرح ڈر گئے ۔لیکن کچھ ہی دیر بعد انھیں یہ محسوس ہوا کہ ہم درخت کے اوپر محفوظ ہیں ۔ چوں کہ ان کے اندر شرارت کوٹ کوٹ کر بھری ہوئی تھی، اس لیے یہاں بھی انھیں شرارت سوجھی اور ان دونوں شرارتی بندروں نے آنکھوں ہی آنکھوں میں اشارا کیا اور درخت کا ایک پھل توڑ کر نیچے گرادیا۔ پھل سیدھا شیر کی ناک پر گرا ، اس نے غصے سے دہاڑتے ہوئے ادھر اُدھر دیکھا جب اس نے اوپر کی طرف دیکھا تو اس کی نظر بندروں پر پڑی ۔بندر کھی کھی کر کے ہنس رہے تھے ، لیکن وہ زیادہ دیر تک نہ ہنس سکے ، کیوں کہ شیر آپے سے باہر ہورہا تھا۔ اس نے گرج دار آواز میں دہاڑتے ہوئے کہا ،’کیا تمہیں معلوم نہیں مَیں اس جنگل کا راجا ہوں۔بندروں کو پھر ہنسی آگئی ۔ انھیں یقین تھا کہ ہم درخت پر محفوظ ہیں ۔ شیر ان کو اس طرح دوبارہ ہنستے ہوئے دیکھ کر مزید غصے سے آگ بگولہ ہوگیا اور اپنے پیروں کو سمیٹ کر اسپرنگ کی طرح تیزی سے اچھلا۔ ان دونوں شرارتی بندروں نے دیکھا کہ شیر کا جبڑا کھلا ہوا ہے اور اس کے تیز نوکیلے دانت ان کی طرف ہیں اور وہ بڑی تیزی سے اچھلتے ہوئے بالکل ان کے قریب آگیا ہے ۔ دونوں بندروں کے تو ہوش ہی اڑ گئے اور ان کی ساری شرارت دھری کی دھری رہ گئی اور وہ دونوںڈر کے مارے ایک دوسرے سے بُری طرح لپٹ گئے ۔

شیر نے چھلانگ تو بہت اچھی لگائی تھی لیکن وہ وہاں تک نہیں پہنچ سکا، جس شاخ پر وہ دونوں بندر بیٹھے ہوئے تھے۔ شیر نے دوبارہ زبردست چھلانگ لگائی ۔ بندروں کی حالت بڑی بری تھی وہ ڈر کر چیخنے چلانے لگے لیکن وہاں ان کی پکار سننے والا کوئی بھی نہیں تھا۔ وہ تو اپنی ٹولی اور اپنے ماں باپ کی اجازت کے بغیر بھاگ کر آئے تھے۔ اس درخت کے آس پاس کوئی دوسرا درخت بھی نہ تھا کہ وہ چھلانگ لگا کر اس پر چلے جاتے ، اور نہ ہی اس درخت پر کہ جس پر وہ دونوں بیٹھے ہوئے تھے اونچی مضبوط شاخ تھی، جس پر جاکر وہ بیٹھ سکتے یوں سمجھ لیں کہ شرارتی اور نافرمان بندر آج بُری طرح پھنس گئے تھے۔

شیر کی تیز دہاڑ اور غراہٹ سے ان کے کانوں کے پردے پھٹ رہے تھے۔ ان کی آنکھوں سے آنسو جاری ہوگئے تھے۔

وہ اس حالت میں تھے کہ انھیں کچھ سجھائی نہیں دے رہا تھاکہ یکایک ان کے کانوں میں دھیمے سے آواز آئی ،’’ گھبراؤ مت ! مَیں تم دونوں کو یہاں سے نکال لے جاؤں گا۔ چپکے سے میری گردن کے سہارے میری پیٹھ پرآجاؤ۔‘‘

بندروں نے دیکھا کہ ان کے ٹھیک اوپردرخت کے پتوں کے درمیان سے اسی زرافہ کا سر نکلا ہواتھا ،جس کی ان لوگوں نے ابھی کچھ دن پہلے خوب مذاق اڑیا تھا۔ انہوں نے ایک دوسرے کو شرمندگی سے دیکھا ۔زرافہ نے کہا،’’ میرے دوستو! جلدی کرو اگر شیر نے مجھے دیکھ لیا تو وہ ہم تینوں کو کھاجائے گا۔‘‘

بندروں نے اب بلاجھجک اس کی گردن پر پھسلتے ہوئے زرافہ کی پیٹھ پر سوار ہوگئے اور زرافہ انھیں لیے ہوئے تیز رفتاری سے وہاں سے بھاگا۔

شیر کو پہلے تو پتا نہیں چل سکا کہ کیا ماجرا ہے ۔لیکن جب اس نے زرافہ کی پیٹھ پر سوار ہوکر دونوں بندروں کو بھاگ نکلتے ہوئے دیکھا تو اس نے دہاڑتے ہوئے ان کا پیچھا کیا۔

بندر وں نے ان کا پیچھا کرتے ہوئے شیر کو دیکھا تو ان کی جان نکلنے لگی اور وہ بری طرح چیخنے چلانے لگے ۔ شیر پوری قوت کے ساتھ بندروں کو پکڑنے کے لیے دوڑ لگارہا تھا۔ زرافہ نے بندروں کو سمجھایا کہ ،’’ ڈرنے کی کوئی بات نہیں اب تم دونوں بالکل محفوظ ہو ۔ شیر مجھے کبھی نہیں پکڑ سکتا ۔‘‘اور سچ مچ ہوا بھی ایسا ہی کہ زرافہ نے شیر کو کافی پیچھے چھوڑ دیا ۔ایک محفوظ جگہ پر پہنچ کر زرافہ رک گیا بندر چھلانگ لگا کر اس کی پیٹھ سے نیچے اتر گئے۔

تب زرافہ نے ان دونوں سے کہا ،’’ اس دن تم دونوں نے میری لمبی گردن اور میری ٹانگوں کی بہت مذاق اڑائی تھی نا ، آج دیکھ لیا نا اسی لمبی گردن کی وجہ سے ہی مَیں تم دونوں کو دور سے دیکھ سکااور درخت سے تم کو اتار سکا اور لمبی ٹانگوں کی وجہ سے تیز دوڑ سکا۔ ‘‘

دونوں نے شرم سےاپنی اپنی گردنیں جھکائے کھڑے تھے ۔ ان کی یہ حالت دیکھ کر زرافہ نے کہا ،’’چلو! چھوڑو ان باتوں کو ، بھول جاؤ پچھلے قصے کو ، اب آج سے تو تم میرے دوست بن کر میرے ساتھ روزانہ کھیلا کرنا۔‘‘

بندروں کو اپنی حرکتوں پر سخت غصہ آنے لگا کہ انہوںنے اتنے اچھے اور پیارے زرافہ کو کیوں ستایاتھا؟ دونوں نے اسی وقت زرافہ سے معافی مانگی ۔دونوں نے فیصلہ کرلیا کہ آج کے بعد سے وہ شرارت نہیں کریں گے۔’’ ہم نے تمہیں جان بوجھ کر بہت ستایا تھا ، آج سے ہم کسی کو بھی نہیں ستائیں گے ، نہ کسی کو بُرا بھلا کہیں گے اور رہی تمہاری بات تو آج سے تم ہمارے سب سے اچھے دوست ہو۔ کیوں کہ دوست وہی سچا ہے جو سکھ سے زیادہ دکھ میں کام آئے اور آج تم نے دکھ میں ہمارا ساتھ دے کر یہ ثابت کردیا کہ تم ہمارے سچے دوست ہو ۔ دونوں بندروں کی یہ بات سن کر زرافہ کو بڑی خوشی ہوئی اور وہ خوشی سےجھومنے لگا۔