آپ آف لائن ہیں
جنگ ای پیپر
جمعہ 21؍ ذوالحجہ 1440ھ23؍اگست 2019ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن


قابض بھارتی حکومت کی جانب سے کرفیو اور پابندیوں کے باعث مقبوضہ وادی کے شہریوں کو آج جمعے کی نماز پڑھنے کی بھی اجازت نہیں ہے۔

مقبوضہ کشمیر میں قابض بھارتی حکومت نے کشمیریوں کی مذہبی آزادی بھی سلب کرلی۔

عید الاضحیٰ کے بعد مقبوضہ وادی میں جمعے کی نماز پڑھنا بھی مشکل ہو گئی، قابض فوج نے کرفیو اور پابندیوں کے دوران شہریوں کو جمعے کی نماز پڑھنے کی اجازت نہیں دی۔

ایک کشمیری شہری نے اپنے ویڈیو پیغام میں اس حوالے سے کہا ہے کہ آج جمعہ ہے، قابض حکومت ہمیں مسجد میں جانے نہیں دیتی، نہ ہی نماز پڑھنے دیتی ہے۔

ایک اور کشمیری شہری کا کہنا ہے کہ پابندیوں اور ہر جگہ رکاوٹوں کے باعث ہمیں شدید پریشانی ہے، یہاں سب کچھ بند ہے، ہم بھی بند ہیں، حکومت جو کچھ کر رہی ہے وہ درست نہیں ہے، یہاں سب ہاؤس اریسٹ ہیں۔

واضح رہے کہ مقبوضہ کشمیر میں قابض بھارتی حکومت کی جانب سے کرفیو کے نفاذ کا آج تیرہواں روز ہے، وادی میں ہر طرف خوف کا ماحول ہے۔

مقبوضہ کشمیر میں بھارتی ریاستی دہشت گردی جاری ہے، مقبوضہ وادی کا رابطہ مسلسل تیرہویں روز بھی دنیا سے منقطع ہے۔

مظلوم کشمیری خوراک، ادویات اور دیگر ضروریاتِ زندگی سے محروم ہیں، جس سے مودی کا ہندو ازم کھل کر سامنے آنے لگا ہے۔

کشمیر میڈیا سروس کے مطابق مقبوضہ وادی میں کرفیو کے باعث انٹر نیٹ اور ٹیلی فون سروس معطل ہے جبکہ تمام رابطے منقطع ہونے سے کشمیری عوام کا رابطہ دنیا بھر سے کٹا ہوا ہے۔

بھارت نے مقبوضہ وادی کو فوجی چھاؤنی میں تبدیل کر دیا ہے اور ہزاروں بھارتی فوجی تعینات کر رکھے ہیں، کرفیو کے باعث ضروریاتِ زندگی، بچوں کے لیے خوراک اور جان بچانے والی ادویات کی قلت کے باعث انسانی بحران پیدا ہو گیا ہے۔

قابض انتظامیہ نے سید علی گیلانی اور میر واعظ سمیت تقریباً تمام حریت رہنماؤں کو گرفتار اور نظر بند کر رکھا ہے جب کہ فاروق عبداللّٰہ، عمر عبداللّٰہ، محبوبہ مفتی سمیت 900 سے زائد سیاسی رہنما زیرِ حراست ہیں۔

گزشتہ روز جموں کے ہندو اکثریتی علاقوں میں پابندیوں میں نرمی کی گئی لیکن مسلمان اکثریتی علاقوں میں تمام تر سختیاں برقرار رہیں۔

اپنی مٹی کے لیے کشمیری ہر قربانی دینے کو تیار ہیں، وادی میں جگہ جگہ کشمیری نوجوانوں کے آزادی کے حق میں نعرے گونجتے رہتے ہیں۔

مقبوضہ وادی کی یک طرفہ حیثیت بدلنے کے خلاف ہر کشمیری بھارت کے خلاف یک آواز ہے اور دنیا کو پیغام دے رہا ہے کہ وہ اپنی مٹی کے لیے ہر قربانی دینے کو تیار ہے۔

بین الاقوامی خبریں سے مزید
ویڈیو رپورٹس سے مزید