شمالی امریکا میں3 ارب پرندے کم ہوگئے

واشنگٹن (جنگ نیوز )شمالی امریکہ میں پرندوں کی تعداد میں تین ارب کے لگ بھگ کمی آ چکی ہے۔

ماہرین اسے خطرے کی ایک علامت کے طور پر دیکھ رہے ہیں۔سائنس دانوں کا کہنا ہے کہ گزشتہ 50 برس کے عرصے میں امریکہ اور کینیڈا میں پرندوں کی تعداد میں تین ارب تک کی کمی آ چکی ہے۔ جو اس علاقے میں پائے جانے والے پرندوں کی کل آبادی کا لگ بھگ 29 فی صد ہے۔امریکی پرندوں کے تحفظ اور مطالعے کی کارنل لیب کے ایک سینئر سائنس دان کین روزن برگ کا کہنا ہے کہ پرندوں کی بہت سی اقسام اس تبدیلی کو قبول نہیں کر پا رہیں جس کا نتیجہ ان کی تعداد میں کمی کی شکل میں ظاہر ہو رہا ہے۔ یہ کمی پرندوں کے تمام گروپس میں ہو رہی ہے۔