ہیمبرگ: کشمیریوں کے حق میں بھارتی قونصلیٹ کے سامنے مظاہرہ

جرمنی کے بندرگاہ شہر ہیمبرگ میں گزشتہ چار ہفتوں سے ہر منگل کو بھارتی قونصلیٹ کے سامنے مقبوضہ کشمیر کے مظلوم کشمیریوں کے حق میں احتجاجی مظاہرہ کیا جاتا ہے۔

بھارتی فوج اور حکومت کی جانب سے کشمیریوں پر ظلم و بربریت کے خلاف نعرے بازی بھی کی جاتی ہے۔ مظاہرین بینرز اور پلے کارڈز کے ذریعے کشمیریوں کے لیے آواز بلند کرتے ہیں اور مقامی افراد کو مقبوضہ وادی کی صورتحال سے آگاہ کرتے ہیں۔

یہ بھی پڑھیے: دفترخارجہ نے بھارتی آرمی چیف کے بیان کو مسترد کردیا

پاکستانی کمیونٹی ہیمبرگ کے زیرِ اہتمام مسلسل چار ہفتوں سے ہر منگل کے روز بھارتی قونصلیٹ کے سامنے وزیراعظم مودی کی ہندو قوم پرست حکومت کی جانب سے کشمیری بچوں، خواتین اور بزرگوں پر مظالم اور کرفیو کے خلاف پُر امن مظاہرہ کیا جاتا ہے۔

اس مظاہرے میں ہیمبرگ کی سیاسی، سماجی اور مذہبی شخصیات کے ساتھ مقامی لوگ بھی شرکت کرتے ہیں۔

یہ بھی پڑھیے: مقبوضہ کشمیر میں لاک ڈاون 51ویں روز میں داخل

منتظمین کے مطابق جب تک مقبوضہ کشمیر میں کرفیو ختم نہیں کیا جاتا اور کشمیریوں کو اُن کے بنیادی حقوق نہیں ملتے، اس وقت تک ہیمبرگ میں اِس نوعیت کے احتجاج جاری رہیں گے۔

علاوہ ازیں گزشتہ ماہ بھارتی ہندو قوم پرست حکومت کی جانب سے جموں کشمیر کی خصوصی آئینی حیثیت منسوخ کرنے کے بعد سے جرمنی کے دارالحکومت برلن سمیت دیگر بڑے شہر فرینکفرٹ، بریمن، ڈریسڈن، میونخ میں بھی مسلسل احتجاجی مظاہرے کیے جاتے ہیں۔