جے یو آئی سے مذاکرات کیلئےابھی کمیٹی کی ضرورت نہیں، وزیراعظم

11 اکتوبر ، 2019

وزیراعظم عمران خان نے کہا ہے کہ جے یو آئی (ف) سے مذاکرات کے حوالے سے کمیٹی کے قیام کی فی الحال ضرورت نہیں مگر مذاکرات کا آپشن کھلا ہے۔ مدرسہ ریفارمز سمیت اہم ایشوز پر کوئی بات کرنا چاہے تو اعتراض نہیں۔

ذرائع کے مطابق وزیراعظم عمران خان کی زیر صدارت حکومتی ترجمانوں کے اجلاس میں وزیراعظم کے دورہ چین، ایران اور سعودی عرب پر بات چیت ہوئی۔

ذرائع کے مطابق وزیراعظم نے کہا کہ دورہ چین کامیاب رہا ،کشمیر مسئلے پر چین ہمارے ساتھ ہے۔

اجلاس کے شرکاء نے کہا کہ وزیراعظم کی کامیاب سفارتکاری سے پاکستان عالمی تنہائی سے نکل چکا ہے۔

ذرائع کے مطابق اجلاس کے اختتام پر جے یو آئی ف کے آزادی مارچ کا تذکرہ ہوا اور شرکاء نے وزیراعظم سے سوال کیا کہ کیا جے یو آئی ف سے مذاکرات کے لیے کوئی کمیٹی قائم کی گئی ہے؟

ذرائع کے مطابق وزیراعظم نے شرکاء کے سوال پر کہا کہ کمیٹی کے قیام کی فی الحال ضرورت نہیں مگر مذاکرات کا آپشن کھلا ہے۔

وزیراعظم نے کہا کہ اگر کوئی خود بات کرنا چاہے تو دروازے بند نہیں ہیں۔

وزیراعظم کا یہ بھی کہنا تھا کہ مدرسہ ریفارمز سمیت اہم ایشوز پر کوئی بات کرنا چاہے تو اعتراض نہیں۔

واضح رہے کہ جے یو آئی ف کے امیر مولانا فضل الرحمان نے آزادی مارچ کا اعلان کررکھا ہے، جو 27 اکتوبر کو شروع ہوگا اور 31 اکتوبر کو اسلام آباد پہنچے گا۔

تازہ ترین