احساس ذمہ داری اور تھوڑی سی عزت بہت کچھ بدل سکتی ہے

28 اکتوبر ، 2019

ایک تجزیہ کار نے اپنی گفتگومیں پینل کے بقیہ لوگوں سے ایک سوال پوچھا کہ سب اداروں کی کارکردگی کو ایک طرف رکھ دیجئے لیکن ذرا ٹھنڈے دل سے سوچ کربتائیں کہ اگر سیاستدان اپنی سیاست سچائی اور ایمانداری کی بنیادوں پر کریں تو کیا پاکستان میں اس سے بہتری پیدا ہونے کہ امکان پیدا ہوں گے؟ اس سوال کو سننے کہ بعد راقم یہ سوچنے پر مجبور ہوگیا کہ پاکستان کو وجود میں آئے 72 سال ہوچکے ہیں مگر ابھی تک یہ فیصلہ ہی نہ ہوسکا کہ پاکستان چلانے کے لیے صحیح معنوں میں اس کشتی کا ملاح کون ہے۔ کبھی مقننہ (پارلیمنٹ) کی بالادستی کی بات ہوتی ہے، تو کبھی آزادعدالتی نظام تمام دکھوں کا مداوانظرآتا ہے ،تو کبھی ماہرین اورمعیشت دانوں کو جمع کرکے تھنک ٹینک کی تشکیل ملکی ترقی کی ضمانت سمجھتی جاتی ہے۔ دوسری طرف غربت کا خاتمہ، انصاف کی بالادستی، یکساں نظام تعلیم، دولت کی منصفانہ تقسیم کردینا ہر مسئلہ کا حل سمجھا جاتا ہے۔ لیکن کبھی سیاستدانوں کاقبلہ درست ہونا مسائل کا حل نہ سمجھا گیا۔ برائیوں کی ساری وجوہات یقیناً سیاستدانوں کے کرتوتوں سے نتھی کی جاتی ہیں ۔لیکن مسائل کے حل کے لیے کبھی ان کی اصلاح پہ بات نہ کی گئی۔ اصلاح کےطریقے کرنا تو دور کی بات کبھی سوچا بھی نہیں گیا۔ سیاست کرنا ہمارے یہاں ایک عیاشی سمجھا جاتا ہے جس کو کرنے والا یقینی طور پر ان کاموں کا ماہرہوتا ہے یہی وجہ ہے کہ ہر غلط کام کی وجہ " سیاست ہوگئی" ہی بتائی جاتی ہے۔ لیکن اب ان تجزیہ کار کے سوال نے چونکا دیا کہ اگرواقعی یہ سیاست دان درست ہوجائیںتو ملک میں بہتری آسکتی ہے۔ کیونکہ ہر عمل کا زینہ سیاستدانوں سے ہی ہوکر گزرتا ہے اور انہیں بھی عوام کے مسائل سے بھرپور آگہی ہوتی ہے۔ اگر وہ ان مسائل کو عوام کی کمزوری سمجھ کر عوام سے لینے کہ بجائے ان کی کمزوری میں مدد کریں اور انہیں طاقت دیں تو کچھ شک نہیں کہ عوام اس وقت بھی آپ کے ہی گن گائیں گے۔ لہذا یہ سوچ کہ جب تک عوامی مسائل موجود ہیں ہماری سیاست زندہ ہے ۔ اس غلط سوچ کو درست کیجئے۔ مثبت سوچ رکھ کر عوامی مسائل ابتدائی مرحلے میں حل کرانے کی کوشش کیجئے۔ اس امید کے ساتھ کہ جب آپ ان کو آگے آواز دیں تو بجائے دو دو ہزار روپے دینے اور آمدورفت کےذرائع فراہم کرنے کے،یہ خود ہی اپنی مدد آپ کے تحت آپ کو لبیک کہیں گے۔ جلسے جلسوں میں اربوں روپے خرچ کرکے عوامی طاقت کا اظہار کرنے سے بہتر نہیں کہ لاکھوں اور کروڑوں روپے کی مدد سے ان کے چھوٹے چھوٹے مسائل حل کریں۔ بہت منفی سیاست کرلی۔ سیاست کے مقدس پیشہ کو بدنام کرلیا ۔اب آیئے سب کچھ چھوڑ کر سیاستدانوں کی اصلاح پر پروگرام کرتے ہوئے انہیں احساس دلائیں کہ ان کی اہمیت بہت زیادہ ہے اور وہ ہی تمام مسائل کو بآسانی حل کرسکتے ہیں۔ احساس ذمہ داری اور تھوڑی سی عزت بہت کچھ بدل سکتی ہے۔

minhajur.rab@janggroup.com.pk

تازہ ترین