غلام بن کر زندگی نہیں گزاریں گے، مولانافضل الرحمٰن

10 نومبر ، 2019

جمعیت علماء اسلام (ف) کے سربراہ مولانا فضل الرحمٰن نے کہا ہے کہ ہم اس ملک میں غلام بن کر زندگی نہیں گزاریں گے، خدا کے لئے ہمیں آئین اور قانون کے دائرے میں رہنے دو۔

آزادی مارچ کاررواں سیرت النبیؐ کانفرنس سے خطاب کرتے ہوئے مولانا فضل الرحمٰن نے کہا ہے کہ دوستی کو قبول کریں گے، دوستی ہم نے امریکہ اور یورپ سے بھی کی ہے لیکن غلامی قبول نہیں کریں گے ہم دنیا میں عزت و وقار سے جینا چاہتے ہیں، ہم دنیا میں اور خطے میں اپنے دوست بڑھانا چاہتے ہیں۔

انہوں نے کہا کہ آج ہی بابری مسجد مسلمانوں سے لے لی گئی ہے اور تم نے کرتارپور کا افتتاح کردیا ہے، بھارت نے کیا کیا، بابری مسجد کا فیصلہ دے کر ادلے کا بدلہ لے لیا، جہاں آئین سبوتاژ ہوا ہے تو پھر وہ ملک نہیں رہے۔ تمہاری نظریں ناک سے آگے نہیں جاتیں۔

مولانا فضل الرحمٰن نے کہا کہ انشاء اللہ ہم نے ملک کو ٹھیک کرنا ہے، پاکستان کا مستقبل سدھارنا ہے۔ یہ ملک ہمارا ہے اس کو ہم نے بنایا ہے اور اس کو آباد رکھیں گے، ہم نے ایک آواز بننا ہے، پاکستان کے مستقبل کو مضبوط کرنا ہے۔

جے یو آئی کے سربراہ کا یہ بھی کہنا تھا کہ پاکستان عظیم مقاصد کے لئے حاصل کیا گیا، لاکھوں لوگوں نے قربانیاں دیں، پاکستان کو مغرب کا گروی بناکر رکھ دیا گیا ہے، پاکستان کو کالونی بنا دیا گیا ہے، نام ہم آزادی کا لیتے ہیں۔

سیرت النبیؐ کانفرنس سے خطاب کرتے ہوئے انہوں نے کہا کہ انگوٹھا چھاپ اسمبلوں کو تسلیم نہیں کریں گے، انگوٹھا چھاپ اسمبلیاں وجودمیں لاکر سمجھتے ہیں ہرفیصلہ ہم کریں گے، ہم ملک میں ایک باوقار، جائر اور آئینی حکومت لانا چاہتے ہیں تاکہ عوام عزت کے ساتھ زندگی بسر کرسکیں۔

انہوں نے کہا کہ پچھلے سال نومبر میں پہلا ملین مارچ کراچی میں کیا تھا، آج آزادی مارچ سیرت کانفرنس میں تبدیل ہوا ہے، دنیا کو پیغام جارہا ہے کہ پاکستان کے عوام حضورﷺ سے کس قدر محبت رکھتے ہیں۔

اسلام آباد کے پشاور موڑ پر جاری جے یو آئی (ف) کے آزادی مارچ دھرنے میں گزشتہ روزسیرت کانفرنس کا انعقاد کیا گیا تھا جس میں علماء اور سیاسی جماعتوں کے رہنما شریک ہوئے تھے۔

تازہ ترین