زبیدہ جلال کی بات کا علم نہیں، کابینہ میں آیا نہیں فیصلہ کیسے ہو گیا ،فواد

کراچی (ٹی وی رپورٹ)جیو کے پروگرام ”آج شاہزیب خانزادہ کے ساتھ“ میں گفتگو کرتے ہوئے وفاقی وزیر سائنس و ٹیکنالوجی فواد چوہدری نے کہا ہےکہ زبیدہ جلال کی بات کا علم نہیں ،معاملہ کابینہ میں آیا نہیں فیصلہ کیسے ہو گیا،جے یو آئی ف کے رہنما اکرم درانی نے کہا کہ اپوزیشن کے 4کروڑ 72کروڑ لوگ وزیراعظم کے استعفے کا مطالبہ کررہے ہیں،ماہرمعیشت محمد سہیل نے کہا کہ اسٹاک مارکیٹ میں تیزی سے بہتری کی بڑی وجہ سیاسی استحکام ہے۔وفاقی وزیر سائنس و ٹیکنالوجی فواد چوہدری نے کہا کہ زبیدہ جلال کہتی ہیں وزیراعظم نے نواز شریف کو باہر جانے کی اجازت دینے کا فیصلہ کرلیا ہے مجھے اس بار ے میں علم نہیں ہے، نواز شریف کا نام ای سی ایل سے نکالنے کا معاملہ کابینہ میں نہیں آیا تو فیصلہ کیسے ہوگیا، وزیراعظم عمران خان کابینہ میں کھلے دل سے بات سنتے ہیں، وزیراعظم نے کئی دفعہ اپنی رائے دینے کے باوجود دلائل سننے کے بعد فیصلہ تبدیل کیا ہے۔ فواد چوہدری کا کہنا تھا کہ کوئی ایسی مثال نہیں کہ سزا یافتہ شخص کو حکومت نے باہر بھیجا ہو،حکومت نے نواز شریف کو باہر بھیجنے کا فیصلہ قانون کے اندر رہ کر کرنا ہے، نواز شریف اور مریم نواز سزا یافتہ مجرم ہیں، فروغ نسیم سے قانونی رائے مانگی ہے کہ کیا حکومت سزا یافتہ مجرموں کو باہر بھیج سکتی ہے، نواز شریف کا اس حوالے سے فیصلہ آئندہ کیلئے مثال بنے گا، لاہور ہائیکورٹ میں آٹھ ہزار لوگوں نے بیماری کی بنیاد پر ضمانت کیلئے درخواستیں دائر کردی ہیں، نواز شریف کے کیسوں میں ماضی میں نئی نئی مثالیں قائم ہوئی ہیں، 2002ء میں بھی نواز شریف باہر چلے گئے تھے۔ فواد چوہدری نے کہا کہ احتساب قانون میں مانیٹرجج موجود ہے جو ہر کیس کو مانیٹر کرتا ہے، ہائیکورٹ میں ایک مانیٹرنگ یونٹ ہے جو روزانہ ہدایات دیتا ہے کہ کتنے عرصہ میں کیس مکمل کیا جائے، پاکستان میں بہت اچھے اسپتال ہیں ۔