میلسی میں 2 بچیوں کا قاتل سگا ماموں نکلا

پنجاب کے ضلع وہاڑی کی تحصیل میلسی میں 2 بچیوں کے مبینہ قاتل کو گرفتار کرلیا گیا ہے، بچیوں کا ماموں ہی ان کا قاتل نکلا۔

ڈی پی او وہاڑی اختر فاروق نے پریس کانفرنس کرتے ہوئے بتایا کہ سگا ماموں کمسن بچیوں کے قتل میں ملوث ہے، ملزم نے ایک بچی کو قتل کرنے سے قبل اس کے ساتھ زیادتی بھی کی تھی۔

ڈی پی او وہاڑی کے مطابق 17 سالہ ملزم اظہر اسی علاقہ کا رہائشی ہے اور اس نے پولیس کے سامنے اپنے جرم کا اعتراف بھی کر لیا ہے، گرفتار ملزم سے مزید تفتیش کی جا رہی ہے۔

پولیس نے ملزم کے کپڑے اور مفلر بھی برآمد کرلیے ہیں، ملزم نے ہاتھوں سے بچیوں کا گلہ دبا کر ان کو قتل کیا ہے بچیوں کے پوسٹ مارٹم کے بعد ان کے جسمانی اعضاء سے نمونے حاصل کرکے پنجاب فرانزک سائنس لیبارٹری لاہور بجھوا دئیے ہیں۔

پولیس کا کہنا ہےکہ ملزم کا چالان بنادیا گیا ہے۔

میلسی: 2 کمسن بچیاں اغواء کے بعد قتل

پنجاب کے ضلع وہاڑی کی تحصیل میلسی کے تھانہ صدر کی حدود میں افسوسناک واقعہ پیش آیا ہے جس میں 2 کمسن بچیوں کو مبینہ طور پر اغواء کرنے کے بعد قتل کر دیا گیا۔

بچیوں کے ورثاء نے واقعے کے خلاف شدید احتجاج کرتے ہوئے ملزمان کی فوری گرفتاری کا مطالبہ کیا ہے، ڈی پی او وہاڑی موقع پر پہنچ گئے ہیں جبکہ آر پی او ملتان نے واقعے کی رپورٹ طلب کر لی ہے۔

تفصیلات کے مطابق تھانہ صدر میلسی کی حدود میں واقع بستی چمن آباد کی رہائشی بچیوں 7 سالہ ثانیہ اور 6 سالہ فوزیہ کو گزشتہ روز مسجد میں قرآن پڑھنے جاتے ہوئے راستے میں سے اغواء کر لیا گیا تھا جن کی گمشدگی کا مقدمہ بچیوں کی والدہ کی مدعیت میں درج کر لیا گیا تھا۔

آج صبح اغواء ہونے والی دونوں بچیوں کی لاشیں ان کی بستی کے قریب واقع مکئی کے کھیت سے مل گئیں۔

اطلاع ملنے پر تھانہ صدر کی پولیس موقع پر پہنچ گئی جس نے لاشوں کو قبضے میں لے کر تحقیقات کا آغاز کر دیا۔