سندھ میں گورنر راج وفاقی حکومت کا خواب ہے، بلاول بھٹو

اسلام آباد (نیوز ایجنسیاں، مانیٹرنگ سیل) چیئرمین پیپلز پارٹی بلاول بھٹو زرداری نے کہا ہے کہ عمران خان نے اپنی جعلی حکومت کو بچانے کیلئے کمپرامائز کیا ہے، سزا یافتہ کو باہر جانے کی اجازت دینے کے بعد عمران کس منہ سے کہتے ہیں کسی کو نہیں چھوڑوں گا۔

جھوٹ بولنا بند کریں اور عوام کے مسائل حل کریں ، سندھ میں گورنر راج وفاقی حکومت کا خواب ہے،ہماری سیاسی جدوجہد جاری ہے، سابق صدر آصف زر داری کی میڈیکل بورڈ کی رپورٹس گیارہ تاریخ کو عدالت میں پیش کی جائیگی، امید ہے ہمیں انصاف ملے گا۔

آج ہمارا وزیراعظم اینٹی کرپشن ایپ لانچ کررہا تھا،جس سے کرپٹ افراد کو ڈھونڈا جاسکے، کیا یہ ایپ کابینہ کے کرپٹ لوگوں کی نشاندہی کریگی۔ ان خیالات کا اظہار انہوں نےوالد آصف زرداری کی عیادت کے بعد پمز اسپتال کے باہر میڈیا سے گفتگو کرتے ہوئے کیا۔ 

مسلم لیگ (ن) کے حکومت سے آئینی معاملات پر بات نہ کرنے کے اعلان پر پی پی چیئرمین کا کہنا ہے کہ ن لیگ نے الیکشن کمیشن اور قانون سازی پر حکومت سے تعاون نہ کرنے کے فیصلے پر اعتماد میں نہیں لیا۔

حکومت کی پوری کوشش ہے کہ الیکشن کمیشن اور دیگر معاملات پر پارلیمنٹ میں اتفاق نہ ہو لیکن اپوزیشن کوشاں ہے کہ پارلیمنٹ میں ہی تمام معاملات حل ہوں۔