کلونجی کا تیل جلد اور بالوں کیلئے مفید

17 دسمبر ، 2019

چھوٹے چھوٹے دانوں والی کالے رنگ کی کلونجی کی افادیت سے بہت کم لوگ واقف ہیں، یہ کھانوں میں استعمال کے ساتھ براہ راست نہار منہ بھی کھائی جاتی ہے جس کے بے شمار طبی فوائد ہیں، کلونجی کا تیل بھی اپنے اندر خوبصورتی کے راز سمیٹے بیٹھا ہے، اگر اپنے بالوں اور جلد کو با رونق بنانا چاہتے ہیں تو یہ رپورٹ آپ کے لیے ہی لکھی گئی ہے ۔

جلد اور بالوں کے ماہرین کا کہنا ہے کہ بالوں کی جڑوں اور جلد کو نم رکھنا چاہیے، جلد خشک رہنے سے چہرے پر وقت سے پہلے جھریاں نمودار ہو جاتی ہیں اور جلد بے رونق لگنے لگتی ہے، بالکل اسی طرح بالوں کی اگر دیکھ بھال نہ کی جائے تو یہ عمر سے پہلے جھڑ سکتے ہیں اور آپ گنجے پن کا شکار ہو سکتے ہیں ، بالوں اور جلد کی خوبصورتی اور ان کے مسائل کا علاج کلونجی کے تیل میں ہی ہے۔

بالوں اور جلد کے لیے کلونجی کے تیل کی افادیت :

اینٹی بیکٹیریل خصوصیات کا حامل

اینٹی بیکٹیریل خصوصیات کے سبب کلونجی کے تیل سے چہرے کی جلد پر مساج کرنے سے ایکنی کا خاتمہ ہوتا ہے اور کیل مہاسوں کی افزائش میں کمی آتی ہے، اس کے استعمال سے جِلدی انفیکشن اور الرجی میں آرام آتا ہے، بالوں کی جڑوں سے سِروں تک کلونجی کے تیل کے استعمال سے خشکی ختم ہوتی ہے، بال جھڑنا بند ہو جاتے ہے اور بے خوابی میں آرام آتا ہے۔

ہفتے میں دو سے تین بار کلونجی کے تیل کے استعمال سے بالوں میں جان آجاتی ہے، بال لمبے ، گھنے اور مضبوط ہوتے ہیں اور چہرے کی جِلد صاف شفاف ہو جاتی ہے ۔

کلونجی کے بیج اینٹی آکسیڈنٹ ہیں

کلونجی تیل کے باقاعدگی کے استعمال سے جلد اور بالوں کے مسائل میں کمی آتی ہے، اینٹی آکسیڈنٹ جز پائے جانے کے سبب جلد اور بالوں کی صفائی بہتر طریقے سے ہوتی ہے، روکھا پن ختم ہو جاتا ہے جبکہ بالوں اور جلد کی مجموعی صحت برقرار رہتی ہے جس سے آپ کی جلد اور بال خوبصورت اور جاندار نظر آتے ہیں۔

تازہ ترین