بھارت میں ’کورونا‘ کا پہلا کیس سامنے آ گیا

30 جنوری ، 2020

بھارت میں بھی کورونا وائرس کا پہلا کیس سامنے آ گیا ہے، بھارتی ریاست کیرالہ میں ایک شہری میں چین کے کورونا وائرس کی تصدیق ہوئی ہے۔

بھارت میں کورونا وائرس کا پہلا کیس ایک طالب علم میں سامنے آیا ہے، جو چین کے شہر ووہان کی یونیورسٹی میں زیرِ تعلیم ہے۔

ٹیسٹ مثبت آنے پر مریض کو کیرالہ کے ایک اسپتال میں الگ حصے میں رکھا گیا ہے۔

طبی حکام کا کہنا ہے کہ مریض کی طبیعت بہتر ہے اور اس کی صحت کی صورتِ حال کا مسلسل جائزہ لیا جا رہا ہے۔

یہ بھی پڑھیئے: کورونا وائرس، خنجراب پاس کو کھولنے کا فیصلہ مؤخر

دوسری جانب چین میں کورونا وائرس سے ہلاک ہونے والوں کی تعداد 180 ہو گئی ہے جبکہ اب تک پونے 8 ہزار سے زائد افراد اس وائرس سے متاثر ہوئے ہیں۔

یہ بھی دیکھئے :چین میں کورونا وائرس سے ہلاک ہونے والوں کی تعداد 180 ہو گئی

دسمبر میں ووہان شہر سے شروع ہونے والا مرض اب تک 18 ممالک میں پھیل چکا ہے۔

کرونا وائرس کی صورتِ حال پر قابو پانے کے لیے عالمی ادارۂ صحت کا ہنگامی اجلاس آج ہو گا، عالمی ادارۂ صحت (ورلڈ ہیلتھ آرگنائزیشن) نے پوری دنیا کو کورونا وائرس سے نمٹنے کے لیے الرٹ رہنے کی ہدایت کی ہے۔

وائرس کے پھیلاؤ کے سبب گوگل نے چین میں تمام دفاتر عارضی طورپر بند کرنے کااعلان کیا ہے، کورونا وائرس سے ہانگ کانگ اور تائیوان کی اسٹاک مارکیٹیں بھی متاثرہوئی ہیں۔

یہ بھی پڑھیئے: کراچی، کورونا کے مشتبہ مریض صحتیابی کے بعد گھر روانہ

کورونا وائرس کے ممکنہ اثرات سے بچنے کے لیے آسٹریلیا پہنچنے والی چین کی خواتین فٹ بال ٹیم کو برسبین کے ایک ہوٹل میں الگ تھلگ کر دیا گیا ہے۔

ادھر چین کے شہر ووہان سے200 کے قریب امریکی شہریوں کو لے کر خصوصی پرواز کیلی فورنیا پہنچ گئی۔