ذمہ دار سوشل میڈیا ضروری!

13 فروری ، 2020

صدرِ مملکت ڈاکٹر عارف علوی کی جانب سے ذرائع ابلاغ کے کردار پر بین الاقوامی کانفرنس میں سوشل میڈیا کےبڑھتے ہوئے غیر محتاط استعمال کی بابت تشویش کا اظہار کرنا اس امر کی نشان دہی کرتا ہے کہ اربابِ حل و عقد میں بھی اس پلیٹ فارم کے منفی و بےدریغ استعمال کے حوالے سے فکر پائی جاتی ہے۔ صدرِ مملکت نے بجا کہا کہ سماجی ذرائع ابلاغ کے موثر و محتاط استعمال کو یقینی بنانے کیلئے عوامی سطح پر آگہی پیدا کرنا ہو گی۔ اس میں کوئی شک نہیں کہ گزشتہ کچھ عرصے میں موبائل فون و انٹرنیٹ تک آسان رسائی ممکن ہونے سے سماجی رابطوں کی ویب سائٹس کے استعمال میں اضافہ ہوا ہے۔ جس سے ایک طرف سماجی رابطوں میں تیزی، عام آدمی میں سیاسی شعور کی بیداری، حقوق کے ادراک سمیت کئی مثبت معاشی و سماجی پہلو سامنے آئے وہیں اس تلخ حقیقت کو بھی نظر انداز نہیں کیا جا سکتا کہ سوشل میڈیا پروپیگنڈا اور جھوٹی خبروں کے جدید آلے کے طور پر بھی استعمال ہو رہا ہے اور اسی پہلو کی صدرِ مملکت نے بھی نشاندہی کی۔ صورتحال کچھ یوں ہےکہ سوشل میڈیا کے پلیٹ فارم پر ذاتی اغراض، نفرت کے پرچار اور عزت و ناموس کو نشانہ بنانے کیلئے اپنی شناخت مخفی رکھ کر کسی بھی قسم کے مواد کی تشہیر ہو سکتی ہے اور نگرانی کا مناسب انتظام نہ ہونے کے سبب ایسی اَن گنت مثالیں و واقعات سامنے بھی آرہے ہیں۔ اس منفی روش پر قابو پانے کیلئے سماج کے سنجیدہ و دانشور حلقوں کی جانب سے مطالبہ کیا جاتا رہا ہے، اب حکومتی سطح پر بھی اس حوالے سے جنبش محسوس ہو رہی ہے۔ اچھا ہوگا کہ تمام سیاسی جماعتیں و سماجی ادارے حکومت کے ساتھ مل کر ایسی حکمت عملی وضع کریں جس میں سیاسی حامی یا مخالف کی تخصیص کیے بغیر نا شائستہ زبان و بیان، جھوٹے الزامات و خبروں کے سدباب کیلئے ایسے اصول و ضوابط طے کیے جائیں جو سب پر یکساں لاگو ہوں، باشعور قومیں یہی کرتی ہیں۔

اداریہ پر ایس ایم ایس اور واٹس ایپ رائے دیں00923004647998

تازہ ترین