ATM کے اندر، باہر افراد ایک دوسرے کو ڈاکو سمجھے

21 فروری ، 2020

کراچی کے علاقے گلبرگ میں واقع ایک نجی بینک کی برانچ کے اے ٹی ایم میں موجود افراد اور باہر موجود افراد ایک دوسرے کو ڈاکو سمجھتے رہے جس پر پولیس کو طلب کر لیا گیا۔

گلبرگ کے اے ٹی ایم میں موجود افراد کو ڈاکو سمجھ کر تشدد کرنے کے لیے باہر مجمع جمع ہو گیا تاہم پولیس نے موقع پر پہنچ کر دونوں کو تھانے منتقل کیا تو دونوں بے قصور ثابت ہوئے۔

پولیس کے مطابق گلبرگ میں مددگار ون فائیو کو نجی بینک کے اے ٹی ایم میں لوٹ مار کی اطلاع ملی تھی۔

پولیس موقع پہ پہنچی تو وہاں ہجوم موجود تھا، اے ٹی ایم میں موجود افراد کو باہر کھڑے افراد نےڈاکو سمجھا، جبکہ اے ٹی ایم میں موجود افراد باہر کھڑے افراد کو ڈاکو سمجھ کر خوفزدہ ہو گئے۔

یہ بھی پڑھیئے: سولجر بازار میں اے ٹی ایم سے چوری کرنے والا گرفتار

ڈاکوؤں کے ڈر سے اے ٹی ایم میں موجود افراد نے خود کو اندر لاک کر لیا۔

پولیس نے اے ٹی ایم میں موجود افراد کو حراست میں لے کر تھانے منتقل کیا۔