حکومت سندھ نے تمام بڑے سرکاری اسپتالوں کے او پی ڈی ڈپارٹمنٹس کو 15 دن کے لیے بند کرنے کا فیصلہ کیا ہے جس کا اطلاق بدھ سے ہو گا۔
حکومت سندھ کے ترجمان کے مطابق تمام بڑے سرکاری اسپتال بشمول قومی ادارہ برائے امراض قلب، سول اسپتال کراچی، جناح اسپتال، قومی ادارہ برائے امراض اطفال اور دیگر تمام ڈسٹرکٹ اسپتالوں میں او پی ڈیز کل سے 15 دن کے لیے بند کر دی گئی ہے۔
ترجمان کا کہنا تھا کہ او پی ڈیز میں روزانہ ہزاروں مریض بہت چھوٹی سی جگہ پر جمع ہوتے ہیں جن میں زیادہ تر بیمار لوگ ہوتے ہیں، خدانخواستہ ان میں چند کورونا وائرس کے مریض شامل ہوگئے تو بیماری کا بہت زیادہ لوگوں میں منتقل ہونے کا امکان ہے۔
حکومت سندھ کے ترجمان کا کہنا تھا کہ صوبائی حکومت نے "سیکنڈ لیول آف لاک ڈاؤن" کا آغاز کردیا ہے جس کے تحت اسپتالوں کی او پی ڈیز سمیت شاپنگ مال، ریسٹورنٹس، سی ویو، تمام پارکس اور سرکاری دفاتر کو بند کر دیا ہے۔
صوبائی حکومت کے ترجمان کا کہنا تھا کہ تمام اسپتالوں کے ایمرجنسی ڈپارٹمنٹ 24 گھنٹے کھلے رہیں گے اور ہر قسم کے مریضوں کو طبی امداد اور دیگر سہولیات مہیا کرنے کے لیے دن رات کام کریں گے۔