بلجیم،کورونا وائرس سے متاثرہ مریض کی بلی بھی وائرس سے متاثر

برسلز(نیوز ڈیسک)بلجیم کے کرائسز سینٹر کے مطابق ایک ویٹرنری سرجن نے مطلع کیا ہے کہ ایک بلی جو اپنے کورونا وائرس سے متاثر مالک کے ساتھ تھی اس میں بھی کورونا وائرس پایا گیا ہے ۔سینٹر کے ماہرین نے خبردار کیا ہے کہ یہ وائرس کسی فرد سے فرد کو ہی نہیں بلکہ کسی بھی جگہ موجود ہو سکتا ہے۔کورونا وائرس کئی گھنٹوں سے لیکر کئی دن تک زندہ رہ سکتا ہے اور یہ وہاں سے جوتوں کپڑوں ، گاڑیوں، جانوروں اور کسی بھی ذریعے سے پہنچ سکتا ہے۔ماہرین نے خبردار کیا ہے کہ گھروں میں رہیں، کم از کم آپس میں ڈیڑھ میٹر کا فاصلہ رکھیں، بار بار ہاتھ دھوئیں، خود بھی محفوظ رہیں اور دوسروں کو بھی بچائیں ۔ دوسری جانب بیلجئم میں کرونا وائرس سے گذشتہ 24 گھنٹے کے دوران 69 افراد ہلاک ہوگئے ہیں ۔ جس کے بعد ہلاک شدگان کی مجموعی تعداد 289 ہوگئی ۔ کورونا پازیٹیو مریضوں کی مجموعی تعداد 7284 تک پہنچ گئی، جن میں گذشتہ 24 گھنٹے میں سامنے آنے والے 1049 مریض شامل ہیں، اسی دوران 490 نئے مریضوں کو اسپتالوں میں داخل بھی کیا گیا۔