کورونا پھیلاؤ، جوڈیشل کمیشن کے قیام کی درخواست مسترد

30 مارچ ، 2020

کورونا، پھیلاؤکےاسباب جاننےکیلئے دائردرخواست مسترد

عالمی وبا کورونا وائرس کے پاکستان میں پھیلاؤ کے اسباب جاننے کے لیے جوڈیشل کمیشن کے قیام کی درخواست مسترد کر دی گئی ہے۔

اسلام آباد ہائیکورٹ کےچیف جسٹس اطہرمن اللّٰہ کی جانب سے پاکستان میں کورونا وائرس کے پھیلاؤ کےاسباب جاننے کے لیےجوڈیشل کمیشن کے قیام کی درخواست مفاد عامہ کے تحت مسترد کردی گئی، اس دوران ایڈیشنل اٹارنی جنرل طارق کھوکھر بھی عدالت میں پیش ہوئے۔

چیف جسٹس اطہر من اللّٰہ نے درخواست مسترد کرتے ہوئے ریمارکس میں کہا کہ اس وقت ملک کو بڑے کرائسز کا سامنا ہے، یہ وقت اتفاق اور اتحاد قائم کرنے کا ہے۔

چیف جسٹس اطہر من اللّٰہ نے مزید کہا کہ آپس میں تقسیم نہ آپ اور نہ اس عدالت کے مفاد میں ہے، اختلافات بھلا کر اکٹھے ہو کر یہ جنگ جیتی جاسکتی ہے۔

واضح رہے کہ سول سوسائٹی کی جانب سے دائر کردہ درخواست میں تفتان بارڈر سے زائرین کی آمد میں حکومتی نااہلی کی تحقیقات کی استدعا کی گئی تھی ۔

دائر کردہ درخواست میں زائرین کی آمد میں زلفی بخاری کے کردار کی تحقیقات کی بھی استدعاکی گئی تھی جبکہ عدالت نےگزشتہ سماعت پروفاق اور زلفی بخاری سمیت فریقین کو نوٹس جاری کر کے جواب طلب کیا تھا ۔

درخواست گزار کی جانب سے التوا کی درخواست بھی مسترد کر دی گئی ہے۔

تازہ ترین