جاپان، فیوجی کیمیکلز کا کورونا کی دوا تیار کرنے کا دعویٰ

جاپان کی معروف اور عالمی شہرت یافتہ کمپنی فیوجی کیمیکلز نے کورونا وائرس کی دوا تیار کرنے کا دعوی کردیا ہے۔

اس حوالے سے فیوجی فلم تویاما کیمیکلز کے صدر جنجی اوکادا نے اعلامیے میں کہا ہے کہ ان کی کمپنی نے انفلوئنزا اینٹی وائرل ڈرگ کے تیسرے فیز میں تیار کی جانے والی دوا جسے اویگان ٹیبلیٹ کا نام دیا گیا ہے، کا کلینیکل ٹرائل شروع کردیا ہے۔

اس دوا کا جنرک نام فیوی پیراور رکھا گیا ہے اس دوا نے کورونا وائرس کے خلاف بہترین نتائج دیئے ہیں ۔

جاپانی اخبار میں شائع ہونے والی رپورٹ میں کہا گیا ہے کہ اس دوا نے سینٹرل نروس سسٹم کی بیماریوں کے خلاف بہترین نتائج دیئے ہیں جبکہ ماضی میں یہ دوا سارس کی بیماری کے خلاف بھی بہترین نتائج دے چکی ہے۔

اعلامیے میں کہا گیاہے کہ فیوجی فلم اور اس کی زیلی کمپنیوں نے مارچ کے آغاز میں دوا کی تجرباتی پیمانے پر تیاری شروع کردی ہے تاہم اس دوا کو جاپانی حکومت کے تعاون سے جاپانی مارکیٹ میں اور عالمی سطع پر تقسیم کیا جائے گا۔

اس حوالے سے پاک جاپان بزنس کونسل کے صدر رانا عابد حسین نے بتایا ہے کہ ان کی فیوجی کیمیکلز کے حکام سے دوا کی تیاری اور تقسیم کے حوالے سے بات ہوچکی ہے اور اگر دوا نے بہتر نتائج دیئے تو وہ دوا کی بہت بڑی مقدار اپنی جانب سے حکومت پاکستان کے توسط سے پاکستانی عوام کے لیے روانہ کریں گے۔

رانا عابد حسین نے دنیا بھر میں مقیم پاکستانیوں سے درخواست کی کہ اس مشکل وقت میں بیرون ملک مقیم پاکستان زیادہ سے زیادہ پاکستان کے عوام کے لیے جو کچھ ہوسکتا ہے وہ کریں اور مشکل وقت میں پاکستانی ہونے کا حق ادا کریں۔