اداکار ہمیشہ انٹرنیشنل ہونا پسند کرتے ہیں : آغا علی

14 جولائی ، 2020

پاکستان ٹی وی انڈسٹری کے معروف اداکار آغا علی کا کہنا ہے کہ اداکار ہمیشہ بین الاقوامی سطح پر کام کرنا پسند کرتے ہیں۔

آغا علی نے اسراء بلجیک کو پاکستانی کمپنی کا برانڈ ایمبیسڈر بنائے جانے پر تنقید کرنے والے فنکاروں کو جواب دیتے ہوئے اپنی ایک انسٹاگرام اسٹوری شیئر کی جس میں اس متعلق اپنے خیالات کا اظہار کیا۔

انہوں نے لکھا کہ ’اداکار ہمیشہ بین الاقوامی سطح پر کام کرنا پسند کرتا ہے اور جب کسی اداکار کو دوسرے ملک سے کسی پراجیکٹ کی آفر ہو تو یہ اس کیلئے قابل فخر لمحہ ہوتا ہے۔‘

آغا علی کا کہنا تھا کہ ’ایسا ہی جب پاکستانی کمپنی کسی بین الاقوامی اسٹار کو برانڈ ایمبیسڈر بنائے تو یہاں کے فنکار غیر محفوظ محسوس کرنا شروع کردیتے ہیں کہ جیسے غیر ملکی اسٹارز اُن کے پراجیکٹس اور کام پر ڈاکہ ڈالنے آئے ہیں۔‘

آغا علی نے اپنے تفصیلی پیغام میں لکھا کہ ’اللہ نے جو آپ کے نصیب میں لکھا ہے اس سے نہ زیادہ ملے گا نہ ہی کم تو لہذا دوسرے ممالک کے فنکاروں کو پاکستان میں خوش آمدید کہیں، اور اپنے لوگوں کو غیر محفوظ محسوس نہ کروائیں، آنے دو جو آتا ہے، خوش رہو اور محنت کرو۔‘

انہوں نے لکھا کہ فواد اور ماہرہ جب اپنا کام ادھورا چھوڑ کر بھارت سے وطن واپس آئے تو ہمیں بہت بُرا لگا تھا، اسی طرح اگر ترکی کے اداکار یا کسی اور ملک کے اداکار یہاں سے جائیں گے تو یقیناً وہاں کے لوگوں کو بُرا لگے گا اور پاکستانی اداکاروں کو ترکی میں جو عزت دی جاتی ہے اس میں بھی کمی ہوگی۔‘

آغا کا کہنا تھا کہ برائے مہربانی غیر ملکی اداکاروں کو پاکستان میں خوش آمدید کہیں اور انہیں اُن کے ملک کی طرح پیار اور عزت دیں۔

انہوں نے لکھا کہ پاکستان کی عزت بھی اسی میں ہے، باقی جو آپ کو ٹھیک لگے۔