لودھراں: تاجروں نے پنجاب حکومت کے لاک ڈاؤن کو مسترد کردیا

مرکزی انجمن تاجران لودھراں نے پنجاب حکومت کے 9 دن کے اسمارٹ لاک ڈاؤن کے فیصلے کو مسترد کردیا ہے۔

انجمن تاجران کے صدر ملک اصغر آرائیں نے پریس کانفرنس میں کہا کہ حکومت کی طرف سے پہلے ہی دو دن کا لاک ڈاؤن کیا جارہا ہے۔

انہوں نے کہا کہ لودھراں میں تاجر جمعہ کو بھی چھٹی کرتے ہیں، اس طرح مہینے میں 12 دن دکانیں بند رہتی ہیں۔

اسمارٹ لاک ڈاؤن کے بہترین نتائج سامنے آرہے ہیں، عثمان بزدار

وزیراعلیٰ پنجاب عثمان بزدار نے لاہور سے جاری کردہ اپنے بیان میں کہا کہ اسمارٹ لاک ڈاؤن کے بہترین نتائج سامنے آرہے ہیں۔

صدر انجمن تاجران نے مزید کہا کہ 4 ماہ سے برا حال ہے، بجلی کے بل، ملازمین کی تنخواہیں اور دکانوں کے کرائے تک ادا نہیں کرپارہے ہیں۔

ملک اصغر آرائیں نے یہ بھی کہا کہ تاجروں کو کاروبار کرنے دیا جائے، وہ ایس او پیز پر سختی سے عمل کریں گے۔