امیتابھ بچن کا کورونا سے صحتیابی کے بعد اظہار تشکر

ممبئی (مانیٹرنگ ڈیسک)بولی وڈ کے لیجنڈری اداکار امیتابھ بچن 23 روز کے بعد کورونا کو شکست دینے میں کامیاب ہوگئے۔امیتابھ بچن 11 جولائی کو کورونا ٹیسٹ مثبت آنے کے بعد سے ممبئی کے نانا وتی اسپتال میں زیرعلاج تھے، جہاں ٹیسٹ منفی آنے کے بعد انہیں گھربھیج دیا گیا۔بگ بی نے اپنی صحتیابی کی خبر سے اپنے چاہنے والوں کوسوشل میڈیا پر خود آگاہ کیا۔ٹوئٹر اور انسٹا پر 77 سالہ اداکار نے فالوورز کیلئے لکھا کہ آج صبح کورونا ٹیسٹ منفی آنے کے بعد مجھے اسپتال سے ڈسچارج کردیا گیا ہے، میں گھرآگیا ہو اور مجھے ابھی اپنے کمرے میں قرنطینہ میں رہناہوگا۔اداکارنے دعائیں کرنے پر عزیزواقارب، مداحوں، دوستوں اوربہترین دیکھ بھال پر ناناوتی اسپتال کے عملے کا بھی شکریہ ادا کرتے ہوئے لکھا کہ میں ہاتھ جوڑ کر اظہار تشکر کرتا ہوں۔امیتابھ بچن کے علاوہ ان کے بیٹے ابھیشک بچن، بہو اداکارہ ایشوریہ رائے بچن اور پوتی ارادھیا بھی کورونا کا شکارتھے، تاہم ایشوریا اوربیٹی کو اسپتال میں 10 روز زیرعلاج رکھنے کے بعد ٹیسٹ منفی آنے پر 26 جولائی کوگھربھیج دیا گیا تھا۔ابھیشک بچن تاحال کورونا سے صحت یاب نہیں ہوسکے اور اسپتال میں زیرعلاج ہیں۔ابھیشک نے والد کی صحتیابی اور اپنے اسپتال میں رہنے سے متعلق ٹویٹس کرتے ہوئے مداحوں کو اس حوالے سے بتایا۔ابھیشک نے اپنے مداحوں سے وعدہ کیا کہ وہ اس وائرس کو شکست دیکر صحتیاب ہوجائیں گے۔اس سے قبل جمرات 23 جولائی کو بھارتی میڈیا پر امیتابھ بچن کا کورونا وائرس ٹیسٹ منفی آنے کی خبر نشر ہوئی تھی جس کی اداکار نے سخت الفاظ میں تردید کرتے ہوئے کہا تھا کہ میں تاحال اسپتال میں زیر علاج ہوں، کورونا ٹیسٹ منفی آنے کی خبر غلط، جھوٹ اور غیر ذمہ دارانہ ہے۔بولی وڈ کے بگ بی اپنی بیماری کے دوران بھی سوشل میڈپا پرخاصے فعال رہے۔