ہمیں حکومت اور فورسز کے شانہ بشانہ کھڑے ہونا ہے، شعیب اختر

پاکستان کے سابق کرکٹر اور راولپنڈی ایکسپریس کے نام سے پہچانے جانے والے فاسٹ بولر شعیب اختر نے پشاور دھماکے پر شدید دُکھ کا اظہار کرتے ہوئے کہا ہے کہ دہشتگردی کے خلاف لڑنے کے لیے ہمیں اپنی حکومت اور فورسز کے شانہ بشانہ کھڑے ہونا ہوگا۔

شعیب اختر نے مائیکرو بلاگنگ سائٹ ٹوئٹر پر پیغام جاری کرتے ہوئے لکھا کہ ’پشاور دھماکے نے ہمیں یاد دلا دیا ہے کہ وہ دشمن عناصر اب بھی ہمارے اردگرد موجود ہیں جن کا مقصد ہمارے ملک کو نقصان پہچانا ہے۔‘

فاسٹ بولر نے اپنے ٹوئٹ میں لکھا کہ ’ہمیں ان عناصر کے خاتمے کو یقینی بنانے کے لیے اپنی حکومت اور فورسز کے شانہ بشانہ کھڑا ہونا ہے۔‘

آخر میں سابق کرکٹر نے پاکستان کی حفاظت کے لیے دُعا کرتے ہوئے لکھا کہ ’اللّہ تعالیٰ ہماری مدد فرمائے۔‘

پشاور دھماکے میں قیمتی جانوں کے ضیاع پر دل شکستہ ہوں، وسیم اکرم

سابق لیجنڈ کرکٹر وسیم اکرم گزشتہ روز مدرسے میں ہونے والے دھماکے کے نتیجے میں قیمتی جانوں کے ضیاع پر دل شکستہ ہیں۔

اُنہوں نے اپنے ٹوئٹ میں ہیش ٹیگ WeStandTogether بھی استعمال کیا۔

دوسری جانب قومی کرکٹ ٹیم کے سابق کپتان وسیم اکرم نے بھی پشاور واقعے پر شدید افسوس کا اظہار کرتے ہوئے کہا تھا کہ ہم ہمیشہ اُن لوگوں سے لڑتے رہیں گے جو پاکستان کی ساکھ کو تباہ کرنے کا ارادہ رکھتے ہیں۔

وسیم اکرم کا کہنا تھا کہ اُن کی دعائیں اُن تمام سوگوار خاندانوں کے ساتھ ہیں جنہوں نے اس افسوسناک واقعے میں اپنے پیاروں کو کھویا اور جن کے عزیز زخمی ہوئے۔

پشاور: مدرسے میں دھماکا، 8 شہید، 112 زخمی

خیبر پختون خوا کے دارالخلافہ پشاور کے مدرسے میں ہونے والے دھماکے کا لیڈی ریڈنگ اسپتال میں زیرِ علاج ایک اور زخمی زخموں کی تاب نہ لاتے ہوئے چل بسا، جس کے بعد دھماکے میں شہید افراد کی تعداد 8 ہوگئی، واقعے میں 112 افراد زخمی ہوئے ہیں۔

واضح رہے کہ گزشتہ روز پشاور کے رنگ روڈ پر دیرکالونی میں واقع مدرسہ جامعہ زبیریہ میں بم دھماکا ہوا تھا جس کے نتیجے میں طلبہ سمیت 8 افراد شہید جبکہ 2 اساتذہ سمیت 112 افراد زخمی ہوگئے تھے، جن میں سے 10 زخمی طلبہ کی حالت نازک ہے۔