اسلام آباد ہائیکورٹ نے سینیٹر فیصل واؤڈا کی نااہلی درخواست نمٹادی

05 اپریل ، 2021

اسلام آباد ہائیکورٹ نے سینیٹر فیصل واؤڈا کی نااہلی سے متعلق انٹرا کورٹ اپیل پر سماعت کرتے ہوئے درخواست واپس لینے کی بنیاد پر نمٹا دی۔

ہائی کورٹ میں سینیٹر فیصل واؤڈا کی نااہلی سے متعلق درخواست کی سماعت کے دوران چیف جسٹس اطہر من اللہ نے جہانگیر جدون ایڈوکیٹ سے کہا کہ آپ درخواست واپس لیں گے یا مسترد کی جائے؟

جسٹس اطہر من اللہنے کہاکہ کیس نہیں بنتا اس لیے درخواست مسترد کررہے ہیں کیونکہ اسمبلی کی رکنیت چھوڑنے پر نااہلی کیس غیر موثر ہو چکا ہے۔

چیف جسٹس اسلام آباد ہائیکورٹ نے استفسار کیا کہ کیا الیکشن کمیشن اس معاملے کو دیکھ رہا ہے؟ جہانگیر جدون ایڈوکیٹ نے کہا کہ الیکشن کمیشن دیکھ رہا ہے لیکن ہائی کورٹ بھی کیس سن سکتی ہے۔

جسٹس اطہر من اللہنے استفسار کیا کہ جب فیصل واؤڈا ممبرقومی اسمبلی نہیں رہےتو عدالت کون سی رٹ جاری کرے۔

چیف جسٹس اطہرمن اللہ نے کہاکہ جدون صاحب آپ سیاسی معاملات لے آتے ہیں، جہانگیر جدون ایڈووکیٹ نے کہا کہ یہ سیاسی نہیں آئینی معاملہ ہے۔

چیف جسٹس اسلام آباد ہائیکورٹ نے کہا کہ عدالت نہ ہی سوسائٹی اور نہ ہی سیاستدانوں کو ٹھیک کرنے بیٹھی ہے۔

اس پر درخواست گزار میاں فیصل نے فیصل واؤڈا کے خلاف اپیل واپس لے لی۔

تازہ ترین