کراچی پورٹ پر کارروائی، کنٹینر سے 57 کلو گرام ہیروئن بر آمد

کراچی(اسٹاف رپورٹر)اینٹی نارکوٹکس فورس نے کراچی پورٹ پرکارروائی کے دوران کروڑوں روپے مالیت کی ہیروئن بیرون ملک اسمگل کرنے کی کوشش ناکام بنادی ۔ترجمان اے این ایف کے مطابق خفیہ اطلاع پر کراچی پورٹ پاکستان انٹرنیشنل کنٹینر ٹرمینل پرکارروائی عمل میں لائی گئی،جس کے دوران کنٹینر کے اندر موجود 3 تھریشر مشینوں سے 57 کلوگرام ہیروئن قبضے میں لے لی گئی،ترجمان کے مطابق پکڑی گئی منشیات کی کھیپ سنگاپور اسمگل کی جانی تھی، کنٹینر ملک عزیز احمد نامی شخص نے سنگاپور کے لیے بک کروایا تھا،برآمد شدہ منشیات کی مالیت بین الاقوامی مارکیٹ میں کروڑوں روپے ہے،منشیات اسمگلنگ کے حوالے سے مقدمہ درج کرکے تفتیش شروع کردی گئی ہے۔