امریکا میں اندرون ملک پرواز کو شدید موسمی خرابی کی وجہ سے متبادل ایئرپورٹ پر اترنا پڑا جہاں تاخیر کے باعث مسافروں کو خوش کرنے کے لیے پائلٹ نے پیزا پارٹی منعقد کردی۔
ایوی ایشن ذرائع کے مطابق ویسٹ انٹرنیشنل ایئر پورٹ فلوریڈا سے شمالی کیرولینا کے شارلٹ جانے والی امریکی ایئر لائن کی پرواز اے اے 4798 کو منزل پر شدید طوفان کی وجہ سے مجبوراً ایئر فورس انٹرنیشنل ایئر پورٹ چارلسٹن پر لینڈ کرانا پڑا۔
چارلسٹن پر لینڈنگ کے بعد ری پبلک ایئرویز کی پرواز کے مسافروں کو منزل پر موسم بہتر ہونے کی امید پر لگ بھگ دو گھنٹے تک طیارے کے اندر ہی بیٹھا کر رکھا گیا۔
ایسے میں مسافروں خاص طور پر بچوں اور خواتین کی بیزاری یقینی تھی۔
مسافروں کی مایوسی ختم کرنے اور انہیں خوش کرنے کے لیے پائلٹ نے تمام مسافروں کے لیے پیزا اور سوڈا ڈرنک کا آرڈر کر دیا، یوں مسافروں کا باقی کا ممکنہ بوریت کا انتظار تفریح میں بدل گیا۔