مائیکل جیکسن کو مداحوں سے بچھڑے 12برس بیت گئے

کنگ آف پاپ میوزک مائیکل جیکسن کو مداحوں سے بچھڑے 12 برس بیت گئے لیکن ان کے گانے اور انداز آج بھی بے حد مقبول ہیں۔

اپنے منفرد انداز کے باعث پاپ موسیقی کی دنیا کے بے تاج بادشاہ بننے والے مائیکل جیکسن نے صرف 5 برس کی عمر میں میوزک کی دنیا میں قدم رکھا، 1964 میں اپنے بھائیوں کے ساتھ ’’جیکسن فائیو‘‘ کے پہلے میوزک البم ’’آئی وانٹ یو بیک‘‘ نے دنیا بھر میں دھوم مچائی۔

مائیکل جیکسن کا پہلا سولو البم ’’آف دی وال‘‘ تھا اور پھر آیا ’’تھرلر‘‘ جسے دنیا کا سب سے زیادہ فروخت ہونے والا البم قرار دیا گیا، پاپ سنگر کی آواز کے ساتھ ساتھ مائیکل جیکسن کے انوکھے ڈانس اسٹائل نے بھی عالمگیر مقبولیت حاصل کی ان کا ’’مون واک‘‘ نامی ڈانس اسٹائل ان کی شناخت بن گیا۔

بیٹ اِٹ، بیڈ، ڈینجرس اور بلی جینز جیسے بلاک بسٹر گیت دینے والے مائیک جیکسن 25 جون 2009 کو اس دنیا سے رخصت ہو گئے لیکن آج بھی اپنے چاہنے والوں کے دلوں میں زندہ ہیں۔