ویکسینیشن نہ کروانے پر سم بند کرنے کیخلاف درخواست مسترد

30 جولائی ، 2021

سندھ ہائی کورٹ نے کورونا ویکسین نہ لگوانے والوں کی موبائل سم اور سوشل میڈیا اکاؤنٹس بند کرنے کے خلاف درخواست ناقابلِ سماعت قرار دیتے ہوئے مسترد کر دی۔

دورانِ سماعت کورونا ویکسین لگانے سے متعلق حکومتی اقدامات کے خلاف درخواست گزار پر عدالت برہم ہو گئی۔

سندھ ہائی کورٹ جسٹس شفیع محمد صدیقی نے کہا کہ حکومت کو صرف ایک شخص نہیں بلکہ آپ کے ساتھ موجود وکلاء کی بھی فکر ہے، کورونا کی وباء کا شکار شخص اپنے ساتھ 200 مزید افراد کو بھی متاثر کرتا ہے۔

انہوں نے کہا کہ کورونا وائرس ایسی وباء ہے جو دوسروں کو بھی اپنی لپیٹ میں لے لیتی ہے، حکومت کو آپ کے کولیگ، فیملی اور ارد گرد اٹھنے بیٹھنے والوں کی بھی فکر ہے۔

درخواست گزار سہیل حمید ایڈووکیٹ نے عدالت میں مؤقف اختیار کیا کہ قانون سازی کے بغیر عوام کو کورونا ویکسین لگوانے کے لیے مجبور نہیں کیا جا سکتا، حکومت کو شہریوں کی موبائل سمیں بند کرنے سے روکا جائے، حکومت کو پہلے قانون سازی کرنا ہوگی۔

جسٹس شفیع محمد صدیقی نے استفسار کیا کہ آپ قانون سازی کا کیسے کہہ سکتے ہیں؟ کورونا وائرس سے متاثرہ شخص شہر میں چلتا پھرتا بم ہے۔