فواد چوہدری کا سندھ حکومت سے صنعتیں کھولنے کا مطالبہ

31 جولائی ، 2021

وفاقی وزیرِ اطلاعات و نشریات فواد چوہدری نے سندھ حکومت سے صنعتیں کھولنے کا مطالبہ کرتے ہوئےکہا ہے کہ سندھ حکومت کے فیصلوں سے تشویش ہے، پہلے بھی کورونا وائرس کی 3 لہروں کا ہم نے کامیابی سے مقابلہ کیا ہے۔

میڈیا سے گفتگو کرتے ہوئے وفاقی وزیرِ اطلاعات و نشریات فواد چوہدری کا کہنا ہے کہ جن صنعتوں میں 100 فیصد ویکسی نیشن ہوگئی ہے، انہیں کھولا جائے۔

انہوں نے کہا کہ سندھ حکومت وفاق اور این سی او سی کی ہدایات کی روشنی میں حکمتِ عملی بنائے، وفاقی پالیسی کے خلاف یک طرفہ صنعتیں بند کرنے سے صورتِ حال خراب ہو گی۔

فواد چوہدری کا کہنا ہے کہ سندھ حکومت کے اقدامات سے تشویش کی لہر دوڑ گئی ہے، سندھ حکومت کے وفاق کے برخلاف اقدامات سے صنعتوں کو نقصان ہو رہا ہے، معیشت کے اوپر جاتے ہوئے لاک ڈاؤن نامناسب بات ہے۔

ان کا کہنا ہے کہ سندھ میں لاک ڈاؤن سے معیشت کو نقصان ہو گا، بے روزگاری بڑھے گی، سندھ حکومت کی پابندیوں سے عام آدمی کی مشکلات میں اضافہ ہو گا۔

وفاقی وزیرِ اطلاعات و نشریات نے کہا کہ آرٹیکل149، 151 اور سپریم کورٹ کے فیصلے کے مطابق صوبائی حکومتیں انفرادی فیصلے نہیں کر سکتیں، سندھ حکومت ویکسی نیشن پر زور دے، لاک ڈاؤن کی بات نامناسب ہے۔

انہوں نے کہا کہ تاجر اور دیہاڑی دار طبقے کو اتنا تنگ نہ کیا جائے کہ ان کی کمر ٹوٹ جائے، سندھ حکومت نے ایس او پیز پر عمل درآمد کیا ہوتا تو صورتِ حال یہ نہ ہوتی، وفاق کورونا وائرس کے خاتمے کے لیے صوبائی حکومتوں سے ہر ممکن تعاون کر رہا ہے۔

فواد چوہدری نے مزید کہا کہ بھارتی حکومت بدقسمتی سے ایسے اقدامات نہ کر سکی کہ کورونا وائرس کی وباء کمزور ہوتی، بھارت کورونا وائرس کی نئی لہر پھیلانے کا سبب بن گیا ہے۔

وفاقی وزیرِ اطلاعات و نشریات کا یہ بھی کہنا ہے کہ بھارت پورے خطے میں ڈیلٹا وائرس کے پھیلاؤ کا ذریعہ بن چکا ہے، بھارتی کی غیر ذمے دارانہ پالیسیوں سے دنیا ڈیلٹا وائرس کا سامنا کر رہی ہے۔

تازہ ترین