خیانت کے مرتکب شخص کی اذان کا حکم

13 اگست ، 2021

تفہیم المسائل

سوال: ایک مسجد کے مؤذّن صاحب عرصۂ دراز سے مسجد کے فنڈ میں خرد برد کررہے ہیں اور کئی مرتبہ پکڑے گئے ، لیکن اپنے عمل سے باز نہیں آتے ۔ اب کیا انہیں ان کے منصب سے معزول کردینا چاہیے ؟(ایک سائل )

جواب: اگر آپ کا بیان درست ہے کہ مؤذّن نے مسجد کا فنڈ غبن کیاہے اورباربار اس امر کا ارتکاب کرتارہاہے ،توٹھوس ثبوت کی بنیاد پراُس کو منصب سے ہٹایاجاسکتا ہے ، رسول اللہ ﷺ کا ارشاد ہے : ترجمہ:’’امام (مقتدیوں کی نماز کا) ضامن ہے اور مؤذن (اوقات صلوٰۃ کے شروع ہونے کا اعلان کرنے میں)امین ہے ،اے اللہ! اماموں کو ہدایت عطا فرما اور مؤذّنوں کی مغفرت فرما، (سُنن ترمذی : 207)‘‘۔

جھوٹ، خیانت، دھوکا دہی ، ان عادات کا مرتکب فاسق ہے ،تاوقتی کہ سچی توبہ کرے اور آئندہ ان حرکات سے اجتناب کرے۔ فاسق کو مسجد میں باقاعدہ مؤذّن مقرر کرنا درست نہیں ہے ۔فاسق کی اذان کے بارے میں فقہی احکام یہ ہیں:علامہ نظام الدین لکھتے ہیں: ترجمہ:’’فاسق کی اذان مکروہ ہے اور اس کا اعادہ نہیں کیا جائے گا، ’’ذخیرہ‘‘میں اسی طرح ہے اور جنبی(یعنی جس پر غسل واجب ہے)کی اذان واقامت بہ اتفاقِ روایات(فقہی) مکروہ ہے۔ بہتر یہ ہے کہ اذان کا اعادہ کیا جائے اور اقامت کا اعادہ نہ کیا جائے، (عالمگیری ، ج:1، ص:54)‘‘۔ بشری کمزوریاں تو سب میں ہوتی ہیں اور مُتَنَبّہ کرکے ان کو اصلاح کا موقع دینا چاہیے ۔لیکن جب کوئی ان اَخلاقی جرائم پر جری ہوجائے ، تو اس کامؤذّن کے منصب پر برقرار رکھنا شرعی وقار کے منافی ہے۔

اپنے مالی وتجارتی مسائل کے حل کے لیے ای میل کریں۔

tafheem@janggroup.com.pk

تازہ ترین