• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ویسٹ انڈیز دورہ پاکستان کے لیے پُرعزم ہے، جونی گریو

فیضان لاکھانی
تازہ ترین
کھیلوں کی خبریں
22 ستمبر ، 2021
ویسٹ انڈیز دورہ پاکستان کے لیے پُرعزم ہے، جونی گریو

کرکٹ ویسٹ انڈیز کے چیف ایگزیکٹو جونی گریو کا کہنا ہے کہ وہ اس سال دسمبر میں طے دورہ پاکستان کے سیکیورٹی انتظامات پر پاکستان کرکٹ بورڈ (پی سی بی) کے ساتھ رابطے میں ہے، فی الحال ویسٹ انڈیز دورہ پاکستان کے لیے پُرعزم ہے، دوسری جانب کرکٹ آسٹریلیا نے موقف اختیار کیا ہے کہ وہ پاکستان کی صورتحال کو مانیٹر کر رہا ہے۔

نیوزی لینڈ اور انگلینڈ کی جانب سے پاکستان کا دورہ منسوخ کیے جانے کے بعد دیگر ٹیموں کے طے شدہ دوروں پر بھی سوالیہ نشان لگ گیا ہے۔

تاہم کرکٹ ویسٹ انڈیز نے پاکستان کو ایک مثبت پیغام دیا ہے کہ اس کی ٹیم فی الحال دورے کے لیے پُرعزم ہے۔

سی ڈبلیو آئی کے چیف ایگزیکٹو جونی گریو کا کہنا ہے کہ ان کی پاکستانی ہم منصب وسیم خان سے بات ہوئی ہے اور ان سے تمام معاملات پر اپ ڈیٹ لی ہے۔

ویسٹ انڈیز کرکٹ بورڈ کا پی سی بی سے رابطہ

ویسٹ انڈیز کرکٹ بورڈ کے سی ای او جونی گریو کاکہنا ہے کہ دسمبر میں دورۂ پاکستان کے حوالے سے پی سی بی سے رابطہ کیا ہے۔

انہوں نے بتایا کہ ایک اور میٹنگ اس ہفتے کے آخر میں ہوگی جس میں ویسٹ انڈیز ٹیم کے دورے کے آپریشنل امور پر تبادلہ خیال ہوگا۔

ان کا کہنا تھا کہ وہ جلد بازی میں کوئی فیصلہ نہیں کریں گے، آزاد سیکیورٹی ماہرین سے بھی رائے لیں گے، پلیئرز کی بھی سنیں گے۔

دوسری جانب کرکٹ آسٹریلیا کا کہنا ہے کہ وہ دورہ پاکستان پر معاملات کو مانیٹر کر رہا ہے، تمام تفصیلات موصول ہونے کے بعد متعلقہ حکام سے بات کی جائے گی۔

واضح رہے کہ ویسٹ انڈیز کو دسمبر اور آسٹریلیا کو اگلے سال فروری میں پاکستان کا دورہ کرنا ہے۔

تازہ ترین